Atu hakma’an todan estudante sira ne’ebe husi familia kbiit la’ek maibe hakarak halo remata estudu, Fundasaun Alola (FA) oferese bolsu estudus ba estudante feto finalista na’in 50 iha Universidade Nasional Timor Lorosa’e (UNTL).
“Sim,programa ida ne’e ami hahu iha tinan kotuk, ami fo apoiu ba estudante feto ne’ebe finalista ona maibe sira balun atu halo tese, sira osan laiha entaun liu husi dalan ne’e ami bele ajuda sira nune’e bele akaba sira nia estudus,” hateten Prezidente Board Fundasaun Alola, Kirsty Sword Gusmao, semana kotuk (26/8) iha Mascarenhas,Dili.
Tuir nia, suporta ida ne’e Fundasaun Alola servisu hamutuk ho Rotary club husi Australia no Embaixada Royal Thailandia.
Prosesu selesaun ba bolseiru sira, FA servisu hamutuk ho parte UNTL nian, bazea ba criteria ne’ebe deside ona, hodi hare estudante finalista feto ne’ebe laiha kbiit ekonomia, oan kiak no difikuldade seluk ne’ebe impede sira atu halo hotu sira nia eskola.
“Balu husi sira konsege para iha prosesu hakerek tese/thesis, sira nia valor Index Prestasi Komulatif (IPK) tenke 2 koma ba leten,”nia dehan.
Embaixadora ba boa edukasaun ne’e hatutan, bolsu estudus ne’e la’os deit ba estudante feto sira iha UNTL maibe mos ba estudante sira iha nivel sekundaria 65, pre sekundaria 16 no eskola primaria iha na’in 16.
Entretantu tuir Embaixador Real Thailandia, Surapan Boonyamanop katak apoiu ne’e sei kontinua iha futuru,liu-liu ba feto sira.
“Ami hetan informasaun husi jornal semanal The Dili Weekly, katak Fundasaun Alola iha programa suporta bolsu estudus ba feto sira,tanba ne’e ohin ami mai entrega chegue ba Fundasaun hodi fb ba iha estudante finalista feto na’in 6 ne’e, no apoiu ne’e sei kontinua,”nia dehan.
Iha fatin hanesan bolseirus Agusta Soares, finalista husi Fakuldade Edukasaun Departementu Inglesh, sente kontente ho apoiu ne’e tanba fasilita ona sira hodi finalizasira nia estudu.
“Hau kontente no agradese ba Fundasaun Alola no Rotary Club ne’ebe suporta ona ami liu husi fo bolsu estudus,e ho sira nia apoiu hau bele gradua ona, hau foin gradua iha semana kotuk ne’e,” dehan Agusta ho kontente.
Estudante ho valor IPK 2,60 esperansa katak programa bolsu estudus ne’e sei la para deit ba sira maibe kontinua iha futuru.
Enkuantu valor osan ne’ebe sira simu kada estudante US$ 500,00 “Hau la dehan ki’ik ka bo’ot maibe sufsiente importante mak hau bele remata hau nia estudus,”nia dehan.
