Diretor Ezekutivu Organizasaun Lalenok Ba Ema Hotu (LABEH) Christoper Hendry Samson prontu tama kadeia bainhira tribunal deside nia sala.
“Hau prontu 100% atu tama hotel Becora bainhira tribunal deside katak hau sala duni,”hateten Christoper Hendry Samson, Diretor LABEH semana kotuk (05/09) iha Tribunal Distrital Dili,Mandarin Dili.
Samson hetan akuzasaun husi Ministeriu Publiku (MP) kona-ba kazu falsifikasaun dokumentus nasionalidade Timor-leste nian inklui ho kazu 6 seluk.
Iha primeira no segundu julgamentu ne’ebe halo iha 4 no 25 Maiu 2011, Tribunal Distrital Dili (TDD) seidauk bele foti desizaun ba kazu ne’e tanba MP lakonsege aprezenta testamunha.
“Iha dia 14 Setembru agora halo tan julgamentu ba dala tolu nian, e iha julgamentu I no II Tribunal hasai tiha akuzasaun 5, falta 2 mak falsifika dokumentus nasionalidade no dez obidensia,”nia dehan.
Tuir nia, nudar sidadaun Timor-leste iha estadu de direitu demokratiku, ema hotu-hotu tenke hakru’uk ba desizaun tribunal tanba tribunal mak instituisaun judisiariu ne’ebe aas liu iha nasaun ida ne’e.
“Hau espera katak iha julgamentu bad ala tolu ne’e, Ministeriu Publiku bele aprezenta ona testamunha, se lae ita hotu lahatene saida maks ei akontese ho kredibilidade Ministeriu Publiku no dignidade justisa iha Timor-leste,”nia preokupa.
Nudar arguidu, nia nafatin prontu koopera hodi hein desizaun husi tribunal maibe arguidu mos iha direitu atu hetan justisa lalais “nune’e labele prejudika bei-beik bah au nia servisu, hau nia moris no vida,”nia katak.
Entretantu tuir Sekretaria Tribunal Distrital Dili ne’ebe la fo sai nia identidade ba publiku, rekonese katak julgamentu ba kazu falsifika dokumentus husi arguidu Christoper Hendry Samson sei hala’o iha 14 Setembru agora.
Enkuantu bainhira jornalista tenta konfirma asuntu ne’e ba iha prokurador ne’ebe toma konta kazu ne’e, maibe sira dehan “ne’e segredu justisa,labele fo sai informasaun ba media,”.
