Relasiona ho planu Sekretariu Estadu Seguransa (SES) nian hodi sosa ro patrulla 10 ba Polisia Maritima (PM) maibe tuir Komandante Unidade Polisia Maritima Superindente Xefe Lino Saldanha, katak tenke harii uluk edifisiu.
“Ne’e inisiativa diak atu fasilita servisu polisia maritima nian hodi kontrola seguransa iha area maritima, maibe primeiru tenke prepara uluk edifisiu no fatin atu tau ro ne’e, tanba osan ne’ebe gasta ne’e boot,”hateten Xefe Lino Saldanha semana kotuk (01/9) iha Sional-Lesidere,Dili.
Saldanha hatutan, nia parte hato’o kestaun ne’e dalabarak ona ba iha Komandante Jeral Polisia Nasional Timor-leste (PNTL) no SES maibe to’o agora laiha rezultadu.
“Durante ne’e ro patrulla ne’ebe iha para deit iha tasi ibun, lor-loron kona loro manas no udan e alende ne’e laiha membru polisia maritima ida ne’ebe iha konesementu sufsiente atu kaer, halo manutensaun ba ro patrulla ne’e,”nia preokupa.
Tuir nia, difikuldade hirak ne’e fo impaktu tebes ba kondisaun ro patrulla nian no la garante atu ro ne’e bele funsiona ho efetivu iha tempu naruk.
Enkuantu total orsamentu hodi sosa ro ne’e, kada ro ho folin um miliaun e tal dolares Amerikanu.
Tanba ne’e husu ba SES, tenke iha planu ne’ebe diak, tenke prepara edifisiu, fatin tau ro inklui prepara rekursu umanu hodi kaer ro ne’e.
