Maske joventude sira iha distritu eziji atu loke kampu desportu ba sira maibe tuir membru Parlamentu Nasional katak planu ida ne’e la tau iha Orsamentu Jeral Estadu (OJE) 2011 nian.
“Iha orsamentu jeral loke desportu nian laiha, maibe iha deit ba rehabilitasaun Stadiu Munisipal no Gedung Matahari Terbit (GMT),”hateten Vise Prezidente Komisaun H,Deputadu Eduardo Barreto semana kotuk (05/09) iha Uma Fukun,Dili.
Tanba ne’e tuir nia,governu labele halo buat barak sein iha orsamentu e orsamentu jeral estadu tina ida Parlamentu aprova dala ida.
Iha fatin hanesan tuir Deputadu Domingos Sarmento katak, atu hamenus problema iha sosiedade nia le’et governu liu husi Sekretariu Estadu Juventude e Desportu (SEJD) iha obrigasaun loke kampu desportu no kampu servisu ba juventude sira.
“Oinsa para juventude sira iha atividades, e Sekretariu Estadu Juventude mak iha kompetensia kona-ba ida ne’e hodi orienta juventude sira, “ hateten Deputadu Sarmentu.
Tuir eis Ministru Justisa ne’e katak, uluk iha projetu Pakote Referendum loke ona kampu desportu iha distritu sira maibe la iha planu diak ate agora estraga hotu.
“Iha Pakote Referendum sira loke kampu basketbol no kampu futebol maibe buat sira ne’e halo arbiru de’it e agora sai aat hotu,”nia dehan.
Tanba ne’e nia parte husu,atu loke kampu desportu ba juventude sira tenke loke iha fatin ne’ebe mak iha komunidade nia le’et atu nune’e juventude sira bele utiliza.
Tuir nia, karik iha eleisaun jeral 2012 Fretilin mak manan, mak sira sei fo prioridade liu ba kestaun ne’e nune’e joventude sira bele espresa sira nia talenta liu husi desportu.
