Membru Parlamentu Nasional preokupa maka’as kona-ba Ministeriu Ekonomia Dezenvolvementu (MED) ne’ebe fahe trator ba agrikultor sira, ne’ebe tuir los kompetensia husi Ministeriu Agrikultura e Peska (MAP) maibe tuir Ministru Joáo Gonçalves katak la’os atu compete maibe kompleta malu.
‘’Ministeriu Agrikultura iha responsabilidade ba grupu no individu ne’ebe ki’ik,enkuantu Ministeriu Ekonomia nia responsabilidade ba koperativas tuir lei haruka,” esplika MED Joáo Gonçalves semana kotuk (07/09) iha Parlamentu.a
Tuir nia, grupu koperativas iha setor oi-oin bele agrikultura, peska, industria no mos bele kreditu nian.
“Se karik grupus koperativas mak hatama proposta ida ,hau iha responsabilidade atu suporta koperativa ida ne’e, “nia katak.
Responsabilidade MED la’os de’it fo treinamentu ba grupu koperativa maibe buka oinsa para grupu sira ne’e bele hala’o sira nia atividade ekonomianian ho diak.
“Se hau hein deit Ministeriu Agrikultura mak fo, entaun hein to’o tinan rua mos grupu hirak ne’e lahetan ekipamentu ruma hodi suporta sira nia atividade,”nia esklarese.
Entertantu Prezidenti Komisaun D, Brigida Coreia hateten ministeriu rua ne’e bele fahe trator ba grupu agrikultura sira maibe tenki halo kordenasaun diak ba malu.
“Tuir hau nia pontu de vista tuir lolos sira halo koperasaun maibe agora dadauk ita hare realidade katak ida idak halo ninian,” Brigida observa.
Atual dosente Fakuldade Agrikultura Universidade Nasional Timor Lorosa’e (UNTL) ne’e hatutan, tuir los MED buka identifika tiha grupu agrikultura,foin rekomenda ba iha MAP hodi fahe ekipamentus ba sira.
“Ida ne’e mak problema ,estadu, governu no povu hotu lamenta ,ami mos lamenta, “Brigida kritika.
Tuir nia, komisaun sempre fo hanoin ba Ministeriu rua ne’e, oinsa mak bele kordena malu molok fahe sasan ruma ba agrikultor ka grupu koperativas sira. “Pelu menus tekniku sira husi MAP nian tenke tau matan.”
