Diretor Lalenok Ba Ema Hotu (LABEH) Christoper Hendry Samson ne’ebe hetan akuzasaun husi Ministeriu Publiku kona-ba falsifika dokumentus nasionalidade nian, prontu tama kadeia ka Hotel Becora bainhira tribunal deside katak nia sala duni.
Deklarasaun ne’ebe kapas, tanba sidadaun ne’ebe diak tenke kumpri desizaun tribunal nian tanba ema hotu iha lei nia okos.
Parte arguidu prontu, maiibe kestaun mak ne’e… desde iha julgamentu primeiru to’o iha julgamentu II, Ministeriu Publiku la aprezenta testamunha ne’ebe sira promote iha loron julgamentu ne’ebe tribunal termina, ne’e signifika katak MP rasik la respeita ona desizaun tribunal nian.
Mosu perguntas iha ita nia kakutak…tebes ka la’e akuzasaun ne’ebe MP halo ba arguidu Samson ne’e? Se los karik tanba sa MP la aprezenta sasin ba kazu ne’e iha julgamentu dala rua ne’ebe hala’o iha loron 04 no 25 Maiu fulan hirak liu ba? Ou ida ne’e hanesan sensasi politika ida husi Ministeriu Publiku, nune’e publiku bele gava katak justisa iha Timor la’os deit ba ema ki’ik maibe mos ba ema bo’ot sira?
Samsom mos baruk tiha ona no nia rasik hateten atu halao kazu ne’e lalais oituan para nia mos bele halao nia moris. No mos nia mos tenki continue buka tan koruptor sira.
Maibe karik la os difisil atu prova kata ema ida Timoroan ka la’e? Lei Inan ka Konstitutisaun RDTL koalia klaru ona katak presiza deit Avo feto ka mane raan ida mos Timoroan para ema ida bele konsidera nudar Timoroan. Simples los. Karika ida ne’e la bele prova entaun bele halo teste DNA ba raan ka foti deit fuk oan ida hosi Sansaun nia ulun no bele halo teste DNA mos liu hosi ne’e. Lei RDTL permiti ida ne’e ka la’e ida ne’e mos kestaun legal ida tan.
Maibe ami senti primeiru tenki prova lai katak Christopher Samson Timoroan ida ka lae tuir termus legal (ran ka liu hosi kaben) ne’ebe iha. Se nia Timoroan entaun hosik nia deit atu bele duni tuir koruptor sira.
Maibe karik bele prova nia la os Timoroan entaun ita tenki husu fali wainhira mak nia hetan nia dokumentus identidade no mos oinsa mak nia hetan dokumentus ne’e karik molok kasamentu? Dokumentus ne’ebe nia hatudu durante julgamentu segundu iha tribunal oin, nia Sertidaun RDTL no mos Kartaun Rejistu Eleitoral. Karik ida ne’e mak investigasaun lolos ne’e presiza halao.
Ema hotu gosta teoria konspirasaun ida maibe ida ne’e ami senti fasil los atu rezolve. Karik la os fasil entaun ema ruma tenki buka esplika ba media selai ami senti diak liu taka deit kazu ne’e.
