Relasiona ho eis Forsa Libretasaun Nasional Timor-leste (FALINTIL) balun la tuir desmobilizasaun iha komemorasaun loron FALINTIL 20 Agostu foin dadauk, inklui Deputadu Cornelio Gama alias L-7, tuir Deputadu Faustino dos Santos alias Renan Selak katak governu implementa tuir lei.
“L-7 rasik hau tenta atu konvense iha ultima ora wainhira hau ba hasoru Primeru Ministru e Primeiru Ministru mos rona katak nia sei la tuir,”hateten eis FALINTIL, atual Deputadu husi bankada UNDERTIM Renan Selak, semana kotuk iha Parlamentu.
Tuir nia,L-7 lakohi tuir desmobilizasaun ne’e problema ninian e governu iha obrigasaun atu kumpri saida mak hakerek ona iha konstituisaun e PN aprova lei nu.3/2006 ne’ebe regula asuntu veteranus nian.
“Hau preokupa oituan alende veteranus, nia mos atual membru PN, nia mak aprova tiha lei governu implementa lei maibe nia mak kontra fali lei e ida ne’e persepsaun ida ne’ebe mak aat ba nia,”nia dehan.
Nia hatutan, mate restu sira ne’ebe mak seidauk rekolla hotu ne’e la iha relasaun ho desmobilizasaun.
“Ba mate restu sira estadu iha dever atu fo osan no ajuda familia sira no tenke desmobiliza organizasoens,” nia hateten.
Iha fatin hanesan tuir Deputadu Vidal de Jesus katak kona-ba mate restu hirak ne’ebe seidauk rekolla, laiha relasaun ho desmobilizasaun “ne’e buat ketak ida e ita labele kahur malu,”nia katak.
Tanba tuir nia, governu halo tuir konstituisaun haruka “Hau hanoin la sala buat ida ,maibe kestaun mak ne’e ita kaer fali kestaun ida mate nian no kaer fali kestaun moris nian ne’e la’o laloos, “Riak kritika.
Entretantu bainhira jornalista koko konfirma asuntu ne’e ba iha Deputadu L-7 maibe lakonsege tanba latama.
