Grupu vulneravel iha aldeia Uai Behe Ana, Suku Gari-Uai, Sub-distritu Baucau, Distritu Baucau deskontente ho uma lima ne’ebe harii husi governu tanba klo’ot liu.
“Estadu halo uma baa mi ne’e diak ona maibe iha parte ida ami ladun kontente tanba uma ne’e klo’ot liu,familia ruma mai toba fatin laiha,”informa vulneravel Rosalina de Souza Freitas, semana kotuk iha nia hela fatin Uai Behe Ana, Baucau.
Nia dehan, uma ne’ebe governu harii fo sira ne’e ho kuartu rua, sala ida, dapur no kompletu ho haris fatin mas klo’ot liu “halo ita bo’ok aan la diak,”.
“Ami hakarak husu ba estadu atu halo uma ba ami vulneravel sira, sebele halo luan oituan tanba ami nia familia sira mai vizita ami, pasiensia toba deit iha sala,” nia husu.
Iha parte seluk Felicidade da Silva,hanesan familia nia sente triste ho kondisaun uma ne’ebe klo’ot.
“ Hau sente triste oituan tanba bainhira hau mai vizita hau nia alin , hau hare katak fatin ne’e klo’ot duni no halo ita bo’ok a’an la diak,” nia preokupa.
Maske nune’e nia agradese ba governu ne’ebe oferese ona uma ho gratuita ba ema vulneravel sira tanba ajuda ona sira atu hela uma ne’ebe saudavel maske klo’ot. “Ami agradese ba governu tanba hakma’an tiha ami nia naha todan ida hodi hela netik uma ne’ebe diak,”nia agradese.
