Vise Prezidente Komisaun B Parlamentar, Paulo Fatima Martins hateten servisu Polisia Intelijensia (PI) mak buka informasaun kona-ba intensaun aat husi ema ruma no hato’o informasaun ne’e ba iha komando hodi halo asaun preventive.
“In prinsipiu servisu Polisia Intelejensia mak atu prevene nasaun husi intensaun aat ema ka grupu ruma, ezemplu hanesan atentadu 11 Fevereiru 2008, seguransa estadu nian dalaruma ema hakarak halo kudeta ruma e buat sira ne’e tenke tau atensaun hotu,” hateten eis Komandante Polisia Nasional Timor-leste (PNTL) ne’e, semana kotuk iha PN.
Tuir nia, atentadu 11 Fevereiru akontese tanba informasaun husi Polisia Intejensia la’o ladun diak e sira la konsege halo preventive maka akontese atentadu ne’e no hakanek xefe estadu.
“Ne’ebe hau hanoin ita nia Polisia Intelejensia presiza servisu maka’as liu tan nune’e bele detekta krime ruma ne’ebe bele akontese iha kualker tempu,” nia husu.
Entretantu bainhira jornalista tenta atu konfirma asuntu ne’e ba iha Xefe Servisu Investigasaun Criminal (SIC) Calistro Gonzaga maibe nia parte lakohi fo informasaun ho razaun servisu PI ne’e sensitive liu no labele fo sai ba publiku.
“Ne’e servisu interno polisia intelejensia nian, publiku labele hatene,” hateten fontes konfirmadu husi SIC.
Iha parte seluk Manuel Neto nudar komunidade hateten katak durante nia seidauk bele bele koinhese diak polisi inteligensia mak oinsa
“Ami hatene mak polisia tranzito, SIC, BOP, no sira seluk tan sira ne’e ami bele koinhese tamba sira ne’e halo duni servisu i ami hare ho matan .” nia informa
Kona ba polisia inteligensia ba sira seidauk bele identifika los ida ne’ebe mak polisia Inteligensia tamba ita hare katak bainhira iha problema ruma mosu sempre akontese kanek ruma ba joven sira i komunidade balun e hetan tiru la hatene los ema sivil bain bain mak tiru ka POlisia mak tiru .
“Hanesan akontesementu ne’ebe akontese iha Bidau joven ida hetan tiru no kanek iha nia liman maibe to’o agora seidauk bele identifika los tamba iha akontesementu ne’eba ema kahur malu deit no la hatene los semak tiru joven ne’e,” nia husu.
