Atu responde preokupasaun mediku no komuniddae sira iha Ospital Referal Suai (ORS) kona-ba ahi ne’ebe la funsiona durante fulan 2 resin ona, Ministeriu Saude haruka ona jerador 3 nune’e sir abele atende komunidade sira ho diak.
“Sim, ami haruka ona jerador 3, ho kapasitas 28 KwA, 60 KwA no 75 KwA ba iha Ospital Referal Suai atu sira bele hala’o sira nia servisu ho diak no normal fali,”hateten Moizes da Costa, Xefe Departementu Kestaun Ekipamentus Medikus MS, semana kotuk iha Kaikoli,Dili.
Tuir nia, la’os deit ba ORS maibe ba ospital hotu iha teritoriu tomak.Oras ne’e dadaun total Ospital Referal hamutuk 6, Sentru Saude 65, Maternidade 32 no Internamentu iha 12.
Nia afirma, bainhira jerador 3 ne’e aloka tiha mak kondisaun laiha mudansa, entaun ospital mak jestaun ladiak.
“Iha ne’eba iha Diretor JeralOspital nian, Administrador ospital, Diretor Klinika nian inklui Diretor Enfermajen, lolos sira halo kontrola ba ba ekipamentus hotu inklui jerador ne’ebe sei fornese ahi ba sira, bee moos nune’e enfermeiru sir abele asistensia saude ba komunidade ho diak,” nia hateten.
Entrertantu tuir Xefe Departementu Farmasia MS, Antonio Ximenes, katak kestaun ahi sempre mate iha ORS tanba kapasidade mak la to’o.
“Nia kapasidade mak la to’o atu kobre iha ospital laran,entaun iha aula rua mak ahi la lakan, liu-liu iha parte radiolojia no sala operasaun, ne’e mak ahi lakan-mate,” nia dehan.
Relasiona ho kestaun ne’e, MS haruka ona ekipa ida hodi tun hare direitamente kona-ba problema ne’e.
