Maske governu bandu ona vendedor sira atu labele fa’an sasan iha trotoar desde tinan kotuk, maibe negosiante sira kontinua fa’an ho razaun tanba governu seidauk kria fatin ba sira.
“Se Governu kria ona merkadu ba ami, ami prontu atu sai husi fatin sira ne’e ,se la’e ami kontinua fa’an iha trotoar,” dehan Jose Manuel, negosiante roda 3, semana kotuk iha Akait,Dili.
Tuir Jose, sira pronto atu ba hatan wainhira governu haruka polisia prende sira nia sasan. “Ami fa’an iha trotoar tanba ami iha razaun,e iha ne’e ami hetan lukru barak,tanba besik estrada ninin, ema la’o ba mai barak,”nia hateten.
Liafuan hanesan mai mos husi negosiante roda 3 iha Palasiu Governu nia oin, Izido da Silva, katak sira pronto sai husitrotoar bainhira governu kria ona fatin ida ne’ebe ho kondisaun diak ba sira.
“Tamba ami nia moris mak ne’e, se governu dehan ami labele fa’an iha fatin sira ne’e ,Governu tenke loke merkadu ne’ebe diak para ami bele fa’an ami nia sasan ba ga,”nia husu.
Entretantu tuir reprezentante povu iha Uma Fukun Parlamentu Nasional (PN),Deputadu Rui Menezes, katak komunidade presiza kolabora ho governu nune’e ptograma ne’ebe governu halo bele alkansa.
“Se la’e susar atu hadia ita nia kapital nasaun ninian, ital abele halo kapital Dili hanesan ita nia bairo, maibe ne’e kapital nasaun Timor-Leste,” Deputadu Rui fo hanoin.
Tanba tuir nia, kapital Dili hanesan odamatan ida ne’ebe nakloke ba mundu internasional, liu-liu bainhira iha vizita ema bo’ot ruma “ita nia nasaun sabraut hela, ne’e fo imajen ladiak entaun ita presiza hadia,”nia dehan.
“Ita hakarak ukun an mak ita tenke kumpri regras ne’ebe regula ita nudar povu ga sidadaun iha kontestu ukun rasik an ninian ,se ita lakohi rona ita nia autoridade sira entaun ita nia ukun an la vale ida,”nia hateten.
Deputadu husi bankada Partidu Demokrasia (PD) ne’e mos husu ba governu buka meius oinsa atu negosiante sira ne’e bele hetan fatin iha merkadu nune’e sira fa’an sira nia sasan.
Enkuantu Deputadu Domingos da Costa sublina katak, governu kria ona merkadu barak iha Dili laran, e lolos negosiante sir abele fa’an sira nia sasan iha ne’eba no husik mamuk trotoar.
“Agora sira mos tenke hatene an katak buat nebe mak estadu halo tiha ona ba sira , sira tenke tur iha ne’eba mak fa’an sasan, labele okupa dalan ba ema la’o la diak,” Deputadu ne’e sujere.
Entretantu bainhira jornalista koko konfirma asuntu ne’e ba iha Administrasaun Dili maibe la konsege tanba Administrador la iha fatin.
