Maske tuir Lalenok Ba Ema Hotu (LABEH) katak Lei Anti Korupsaun ladun forte maibe membru parlamentu nasional konsidera lei ne’e forte atu halo justisa ba koruptor sira liu-liu hare kona-ba kualidade obras governu nian.
“Hau hanoin, LABEH hakarak ka lakohi lei ne’e forte atu hare kualidade obras ne’ebe governu fo iha emprezariu sira, ezemplu se halo ponte ida liu fulan rua mak ponte ne’e tun ka monu, tuir lei sira tenke responsabiliza,” hateten Deputadu Manuel Tilman, semana kotuk iha PN.
Tuir nia, katak lei anti korupsaun ne’e hanesan lei especial ida atu hatutan buat ne’ebe define tiha ona iha kodiku penal.
“Buat foun iha lei anti korpusaun mak responsabilidade iha obras hanesan Pakote Referendum (PR), PDD 1, PDD 2, PDL e uma lima kada aldeia, signifika katak lei ida ne’e forte,” Deputadu Tilman reforsa.
Tanba ne’e nia parte husu LABEH, atu lee didiak kontiudu husi lei ne’e, labele hare deit ba jeneralidade e karik loron ida lei ne’e aprova, se mak manan konkursu ba obras tenke hare tuir nia kualidade.
Deputadu Tilman afirma tan katak lei ne’e halo tiha ona audensia publikas e hein para hatama relatoriu iha parlamentu atu aprova jeneralidade.
Deputadu Tilman mos husu ba LABEH katak wainhira atu halo diskusaun projetu de lei iha parlamentu nasional, tenke hato’o sira nia propostas mai iha Parlamentu.
Entretantu tuir Deputadu Rui Menezes husi bankada partidu Demokrata (PD), katak kona-ba kombate korupsaun governu forma ona instituisaun Komisaun Anti Korupsaun (KAK) tanba ne’e husu ba ema hotu respeita saida mak governu halo.
“Hau dehan katak estadu ida ne’e iha komitmentu forte atraves governu ne’ebe ohin loron kaer ukun no mos parlamentu nasional tamba ne’e mak ita hari tiha ona orgaun ida ba kombate korupsaun e agora atu estabelese lei kona-ba kombate korupsaun nian, Deputadu Menezes dehan.
Tuir nia, estadu labele funsiona ho perspektivas aktivista ninian tanba sira la iha responsabilidade direita ba povu no nasaun ida ne’e.
Enkuantu tuir Deputada Cipriana Perreira, katak LABEH halo kritika kona-ba lei ne’e tanba sei esbosu hela. “Bainhira parlamentu aprova ona mak foin dehan lei, entaun se deit bele halo kritika kuandu sei esbosu lei,” nia dehan.
