Uma-kain hamutuk 30 iha Suku Uma-Tolu, Aldeia Karek-Maruk, Postu-Administrativu Lakluta, Munisípiu Viqueque, dadaun ne’e asesu ona bee moos liuhusi projetu ne’ebé implementa husi Adventist Development and Relief Agency (ADRA), ho objetivu atu hadia kondisaun moris no saúde komunidade nian.
Reprezentante benefisiáriu, Germano Amaral, hateten katak sira agradese tebes ba apoiu ne’ebé ADRA fó, tanba durante tinan barak liubá, komunidade enfrenta difikuldade boot atu hetan bee moos.
“Antes ne’e ami susar tebes atu hetan bee moos, tenke la’o dook liuhusi kilómetru ida (1). Dala barak ami uza de’it bee-matan ne’ebé avo sira husik hela mai ami. Liuhusi projetu ADRA nian, ami bele asesu ba bee moos iha ami-nia suku rasik,” hateten Germano iha nia rezidénsia, Suku Uma-Tolu, Aldeia Karek-Maruk.
Nia esplika katak antes projetu ne’e implementa, komunidade tenke la’o dook to’o kuaze kilómetru ida (1) atu kuru bee moos, no dala barak uza nafatin bee-matan tradisionál ne’ebé la garante limpeza no saúde.
Iha parte seluk, Xefe Suku Uma-Tolu, Eduardo Soares, husu komunidade atu tau-matan no kuidadu di’ak ba infraestrutura no ekipamentu sira ne’ebé oferese husi parseiru sira, atu nune’e bele uza ba tempu naruk no fó benefísiu ba jerasaun oin mai.
“Importante tebes atu ita hotu-hotu hamutuk kuidadu sasan sira ne’ebé fó ona, tanba ida-ne’e mak atu garante katak projetu ne’e bele kontinua fó benefísiu ba komunidade iha tempu naruk,” nia dehan.
Koordenadór Programa ADRA, Hendrique Gonçalves, hateten katak sira kontente tebes ho kooperasaun ne’ebé komunidade hatudu durante implementasaun projetu ne’e.
Nia hatuten tan katak komunidade, inklui ema ho defisiénsia no ferik-katuas sira, partisipa ativamente hodi garante projetu ne’e bele remata ho di’ak.
“Ami kontente tebes tanba komunidade fó apoiu tomak, liuliu ba grupu vulnerável sira hanesan ema ho defisiénsia no ferik-katuas. Ida-ne’e mak halo servisu ne’e la’o di’ak to’o remata,” hateten Hendrique.
Nia aumenta katak ADRA sei iha komitmentu nafatin atu kontinua fó apoiu ba komunidade sira iha rai-laran ne’ebé sei presiza ajuda, liuliu iha área bee no saneamentu, atu nune’e bele hadia saúde no moris di’ak populasaun nian.
Projetu bee moos ida-ne’e konsidera hanesan pasu importante ida atu reduz problema saúde ne’ebé liga ho falta bee moos no iha tempu hanesan hadia bem-estar komunidade iha área rurál sira iha Munisípiu Viqueque.
