Ministériu Koordenasaun Asuntu Ekonómiku (MKAE), liuhusi Institutu Kualidade Timor-Leste (IQTL), harii laboratóriu foun atu kontrola kualidade alimentasaun no bebidas iha Timor-Leste.
Koordenadór-Jerál MKAE, Jorge Rui de Carvalho, hateten katak projetu laboratóriu refere responde ba nesesidade urjente setór privadu nian, liuliu ba esportasaun, tanba bele halo teste kualidade iha rai-laran no la presiza lori amostra produtu ba teste iha laboratóriu iha rai-li’ur, ho kustu aas no tempu naruk.
“Laboratóriu ida-ne’e importante tebes tanba bele ajuda diretamente setór privadu sira. Entaun, ho fasilidade ida-ne’e iha rai-laran, sei fasilita prosesu sertifikasaun no aumenta kapasidade esportasaun Timor-Leste nian,” dehan Jorge iha lansamentu ofisiál tau fatuk dahuluk ba konstrusaun iha Bebora, Díli.
Nia mós hatutan katak atualmente Timor-Leste iha ona laboratóriu ba kalibrasaun, maibé seidauk iha laboratóriu espesializadu ba teste kualidade alimentasaun no Bebidas.
Nia haktuir katak tanba ne’e, konstrusaun laboratóriu foun ida-ne’e sei kompleta sistema infraestrutura kualidade nasionál, hodi garante produtu sira ne’ebé sai ba merkadu iha padraun ne’ebé aseitável.
Iha parte seluk, Prezidente IQTL, Izilda Manuela da Luz, subliña katak laboratóriu ne’e la’ós de’it iha funsaun testajen, maibé mós sei sai hanesan sentru sientífiku ida hodi fornese dadus kredível no konfiável ba governu no parte interesada sira.
“Laboratóriu ne’e sei monitoriza kualidade no seguransa alimentasaun no bebidas, apoia implementasaun regulamentu governu. Fornese mós evidénsia sientífika hodi apoia prosesu foti desizaun regulatória. Ida-ne’e importante tebes atu proteje saúde públika no garante konsumidór sira hetan produtu seguru,” dehan Prezidente Izilda.
Nia mós hateten katak durante ne’e, tanba falta laboratóriu, emprezáriu sira presiza gasta osan lubuk ida atu lori amostra ba teste iha rai-li’ur, ne’ebé dala barak halo produtu lokál la bele konkore ho produtu rai-li’ur nian no produtu importadu sira.
Nia akresenta katak ho implementasaun projetu ne’e, governu espera bele hamenus dependénsia ba servisu rai-li’ur, hadia efisiénsia iha prosesu sertifikasaun no fó oportunidade boot liu ba produtu lokál sira atu tama iha merkadu internasionál.Nia salienta tan katak iha tempu hanesan sei kontribui ba hadia sistema seguransa alimentár nasionál, ne’ebé iha relasaun direta ho saúde públika komunidade ni’an.
