Autoridade lokál konsidera lixu nafatin naklekar iha área públiku no merkadu tanba aplikasaun lei kona-ba jestaun lixu sei fraku no falta disiplina husi komunidade sira.
Xefe Suku Bebonuk, Alfredo da Costa, hateten katak lei kona-ba jestaun lixu seidauk forte atu halo komunidade tauk soe foer arbiru iha fatin públiku. Nia considera governu presiza aumenta kontrolu no fó sansaun klaru, hanesan multa, ba ema sira ne’ebé viola regra, atu bele hamosu disiplina iha komunidade.
“Se la iha medida ne’ebé forte, komunidade sei kontinua halo tuir sira-nia hakarak. Ita presiza kaer no fó kastigu ba ema ne’ebé soe foer arbiru atu nune’e sira tauk,” dehan Alfredo iha nia knaar-fatin, Suku Bebonuk, Díli.
Nia hatutan katak autoridade lokál nafatin servisu hamutuk ho komunidade hodi halo limpeza iha suku laran, maibé la bele hein de’it governu atu rezolve problema tomak.
Iha parte seluk, Prezidente Autoridade Munisípiu Díli, Francisco dos Santos, husu komunidade atu koopera ho autoridade hodi hadia jestaun lixu.
“Dala ruma ita avizu ona atu labele soe lixu iha loron, maibé komunidade balun nafatin soe de’it. Kalan ita halibur tiha, maibé aban loron fatin ne’e nakonu fila fali,” dehan Francisco.
Nia mós esplika katak autoridade muda ona oráriu rekolla lixu, ne’ebé agora hahú husi lokraik tuku neen (6) to’o dader tuku neen (6). Nia haktuir katak komunidade sira ne’ebé atu soe lixu presiza kumpri oráriu ne’ebé determina ona atu evita akumulasaun lixu iha fatin públiku.
Iha parte seluk, komunidade Suku Bebonuk, Tachia Fernandes, dehan katak nia apoiu esforsu limpeza ambientál no husu partisipasaun ativa husi sidadaun hotu. Nia dehan dadaun ne’e ema barak hahú sai husi uma atu halibur lixu, hamoos bee-dalan no organiza fatin sira atu sai moos liu.
“Limpeza la’ós de’it responsabilidade governu, maibé responsabilidade hamutuk entre autoridade no komunidade. Se ita rasik la tau matan ba ambiente, ema seluk mós sei la halo ba ita,” dehan Tachia.
Autoridade no komunidade espera katak ho kooperasaun di’ak no implementasaun lei ne’ebé forte, problema lixu iha fatin públiku bele diminui no hadia kondisaun ambientál iha Díli.
