Conselho Nacional da Juventude de Timor-Leste (CNJTL) kontinua fó oportunidade ba joven sira husi organizasaun no instituisaun oioin atu aprende edukasaun sívika hodi hasa’e sira-nia koñesimentu kona-ba direitu, dever no responsabilidade nu’udar sidadaun di’ak.
Prezidente CNJTL, Maria Dadi Soares Magno, hateten katak organizasaun ne’e kontinua fó prioridade ba programa edukasaun sívika, tanba konsidera importante hodi prepara joven sira atu komprende sira-nia direitu no dever.
“Kuandu joven sira komprende sira-nia direitu, dever no valór patriotismu, sira bele sai sidadaun di’ak ne’ebé kontribui ba unidade nasionál, konstrusaun no dezenvolvimentu país,” dehan Prezidente CNJTL Maria iha Farol, Díli.
Nia esplika katak durante tinan 2026 ne’e, CNJTL fó fokus liu ba formasaun edukasaun sidadania atu ajuda joven sira komprende Estadu de Direitu Demokrátiku, Konstituisaun no responsabilidade sidadaun nian.
Nia akresenta katak partisipasaun ativa joven sira iha atividade edukativa refere importante tebes, tanba bele prepara sira atu enfrenta dezafiu iha futuru no sai líder ne’ebé responsável.
Entretantu, membru Estudante Handomi Natureza (ESHANA), Evangelina Francisca Ximenes, ne’ebé partisipa iha atividade formasaun sívika CNJTL nian, hateten katak liuhusi formasaun ne’e nia aprende barak kona-ba sidadania, liuliu direitu no dever sidadaun nian tuir Konstituisaun RDTL.
“Nu’udar sidadaun ida, ita tenke hatene ita-nia direitu no liberdade sira, maibé iha tempu hanesan ita mós tenke kumpri ita-nia dever ba Estadu no sosiedade,” dehan nia.
Tuir nia, sensibilizasaun refere bele ajuda joven sira komprende importánsia kumprimentu lei, partisipa ativamente iha dezenvolvimentu nasaun, proteje patrimóniu públiku no kontribui ba Estadu liuhusi responsabilidade sira ne’ebé iha.
“Liuhusi atividade ida-ne’e, joven sira bele komprende di’ak liután kona-ba sidadania, direitu no dever, no kontribui ba dezenvolvimentu Timor-Leste,” dehan Evangelina.
Nia mós observa katak iha komunidade balun, juventude sira dala barak hetan estereótipu negative no tanba ne’e, edukasaun sívika bele ajuda sira dezenvolve espíritu nasionalismu no patriotismu hodi hadomi no kontribui ba rai doben Timor-Leste.
