Sekretáriu Estadu Asuntu Toponímia no Organizasaun Urbana (SEATOU), Germano Santa Brites, dehan katak animál ne’ebé sirkula livre iha Aeroportu Internasionál Nicolau Lobato tenke oho bainhira autoridade seguransa sira hetan.
“Animál ne’ebé sirkula livre iha aeroportu tenke oho. Aeroportu tenke livre husi situasaun sira-ne’e,” nia hatete.
Nia dehan katak sei komunika ho autoridade seguransa sira ne’ebé destaka iha aeroportu atu toma atensaun sériu, no bainhira animál sira tama iha área aeroportu tenke tiru mate.
“Atu tiru tenke uza kilat ne’ebé lian laiha,” SEATOU Brites hatete iha Aeroportu Díli.
Nia dehan katak komunidade sira tenke kumpre Dekretu-Lei N.º 12/2014 kona-ba proibisaun husik animál sirkula livre iha área urbana, tanba ne’e, komunidade sira ne’ebé iha animál labele husik sira arbiru.
Xefe Suku Madohi, Bernadino de Cristo, dehan katak iha Suku Madohi sosializasaun kona-ba Lei N.º 12/2014, ne’ebé ko’alia kona-ba bandu husik animál sirkula livre iha sidade, halo beibeik ona ba komunidade, maibé balun la koopera no kontinua husik animál arbiru.
“Ha’u-nia komunidade ne’e ulun-to’os, tanba ne’e mak sira husik animál arbiru hodi tama no sai iha aeroportu. Tanba ne’e, karik hetan, oho de’it,” nia dehan.
Nia dehan katak bainhira animál tama iha aeroportu, situasaun ne’e inkomoda tebes no bele lori risku bainhira mosu dezastre.
“Autoridade nafatin koopera ho komunidade hodi solusiona situasaun ne’e, liuliu kona-ba hakiak no husik animál livre,” Xefe Suku Madohi Cristo hatete.Enkuantu, Suku Madohi iha populasaun hamutuk ema 17 mil, kompostu husi aldeia hitu.
