Deputadu iha Parlamentu Nasionál, Antonio Verdial de Sousa, hatete katak kazu na’ok ne’ebé kontinua akontese iha kapital Díli kada loron kauza husi falta kampu servisu.
“Ita bele dehan katak kazu na’ok sira ne’e kauza husi falta kampu servisu. Tanba ne’e, bainhira governu kria kampu servisu ba sidadaun sira, kazu na’ok sei bele menus tanba ema hotu preokupa ho servisu no ekonomikamente sufisiente, no ema sei la kria grupu organizadu hodi na’ok,” nia dehan.
Nia dehan katak kazu na’ok ne’ebé envolve tantu minoridade no adultu sira liga ho problema finanseiru ne’ebé obriga balun atu na’ok. Nia afirma mós katak iha grupu organizadu balun ne’ebé lidera husi ema adultu no envolve labarik minoridade sira atu hala’o atividade na’ok, depois fó osan ba sira.
“Ita haree na’ok iha Díli laran ne’e la’ós de’it telefone, maibé karteira, ema-nia osan iha pasta, motor no sasan sira ne’ebé folin boot,” Deputadu Verdial hatete.
Deputadu haktuir katak, relasiona ho akontesimentu refere, governu tenke kria polítika atu aumenta kampu servisu ba sidadaun sira, nune’e bele hamenus kazu na’ok.
“Polísia bele halo atuasaun ba kondisaun hirak ne’e, maibé ita tenke hatene tanba saida mak ema bele sai na’ok-teen. Ita tenke buka uluk motivu, maibé prontu, ne’e hahalok ne’ebé la di’ak no polísia tenke kaer sira,” nia informa.
Nia hatete katak aktu na’ok sai ona problema nasionál no nia kauza ida mak problema ekonomia.
Entretantu, Xefe Suku Kaikoli, Postu-Administrativu Vera Cruz, Munisípiu Díli, Hipolito Sarmento, dehan katak loos duni kazu na’ok balun akontese tanba problema ekonomia no falta kampu servisu, maibé iha mós servisu barak ne’ebé ema bele halo hodi buka osan.
“Ita labele hein de’it kampu traballu husi governu, maibé ita mós presiza kria servisu no buka rasik servisu. Se buat hotu ita hein governu, ema hotu sei sai na’ok-teen,” nia hatete.
Nia fó ezemplu ba labarik sira ne’ebé fa’an mantolun no krupuk iha dalan públiku, ema idozu sira ne’ebé lori sasan tama-sai bairru, no joven feto no mane balun ne’ebé fa’an pulsa no sigaru hodi buka rasik osan no la’ós hein de’it governu.Nia hatete katak problema ne’e la’ós de’it kestaun falta kampu traballu, maibé mós menus edukasaun no kontrolu husi uma-laran, bainhira inan-aman abandona oan sira no husik sira livre, ikus mai bele envolve iha atividade na’ok.
