Governu liuhusi Ministériu Interiór (MI) kria ona ekipa juri ba rekrutamentu kadetes foun Polisía Nasionál Timor-Leste (PNTL) nian ne’ebé sei realiza iha tinan 2026 ne’e nia laran.
Ministru MI Francisco Guterres dehan, ekipa juri ne’ebé forma ne’e la’ós membru polísia de’it, maibé iha mós Polisía Australía no Portugál nian nune’e mós husi Komisaun Funsaun Públika.
“Ita kria ona ekipa juri hodi prepara ba rekrutamentu kadetes foun PNTL nian. Ekipa de juri husi Austrália reprezenta husi ofisial na’in-rua (2), Portugál husi Guarda Nasionál Repúblikana (GNR) na’in-rua (2), PNTL na’in-rua (2) kompostu husi Asistente Komissariu na’in-ida (1) Superientendente Xefe nain ida (1), no KFP Komisariu nain ida (1),” nia salienta.
Nia hatete, iha teste ba rekrutamentu ne’e iha teste kultural nian sei realiza husi KFP no sei fó husi GNR no polísia Austrália sira, utiliza sistema dijitalizasaun atu pasa ka la pasa kandidatu sira haree kedas sira-nia valór.
“Teste ne’ebé ita sei aplika mak eleminatoriu bainhira liu iha teste kultural mak ba teste fiziku, se la liu entaun sai ona,” nia informa.
Nia hatete, iha prosesu rekrutamentu ne’e garante katak sei laiha tan iregularidade, tanba rekrutamentu anterior ne’e sai ona lisaun ba komisaun no polísia sira.
Iha parte seluk foin-sae Armando de Souza dehan, rekrutamentu ne’ebé justu no la inklina sistema famíliarismu, iha komisaun tenke forma husi GNR no polísia husi nasaun seluk ne’ebé mak durante ne’e apoiu iha instituisaun PNTL.
“Bainhira iha rekrutamentu ba inklina maluk Timoroan iha laran sei la murni no nafatin sei mosu famíliarismu no nepotismu hodi la fó oportunidade ba povu ai-leba nian oan,” nia hatete.
Nia dehan, povu ai-leba nia oan barak mak iha fiziku di’ak, mentalidade di’ak no matenek, maibé bainhira tuir kualker teste inkliu polísia sira la pasa, tanba maluk iha laran laiha.”Ita espera katak iha rekrutamentu membru foun PNTL ida-ne’e no komisaun ne’ebé foun inkliu husi GNR no Polísia husi Astraliano ne’e sei iha prosesu ne’ebé mak murni no la inklina familiarismu,” foin-sae Souza dehan iha Palacio do Governo, Díli.
