Komunidade jornalístika iha Timor-Leste simu ho laran taridu no tristeza bo’ot, hafoin rona katak jornalista seniór Otelio Ote hakotu ona nia perigrinasaun iha mundu ida-ne’e.
Editora husi media Timor Post, Isabel Ermelita, hateten matebian Otelio Ote husik hela tristeza bo’ot, la’ós de’it ba família no kolega sira, maibé mós ba setór komunikasaun sosiál tomak ne’ebé durante tinan barak simu ona ninia kontribuisaun.
“Ita konsidera Otelio Ote nu’udar figura importante ida ne’ebé iha papel bo’ot iha dezenvolvimentu jornalismu iha Timor-Leste. Matebian Ote la’o ho komitmentu aas ba étika jornalístika, independénsia no responsabilidade, no sempre fó inspirasaun ba jornalista sira atu halo servisu ho profesionalizmu,” dehan Editora Isabel iha Aeroporto Internacional Nicolau Lobato, Díli, durante simu isin matebian fila mai iha kapital Dili.
Nia hatutan, matebian mós hanesan mentor ida ne’ebé fó didikasaun no orientasaun ba jerasaun foun sira iha área komunikasaun. Barak hosi jornalista tuan no foun sira aprende diretamente husi Otelio Ote, liu husi treinamentu formál nomós esperiénsia prátika iha fatin servisu.
“Otelio Ote la’ós de’it kolega servisu, maibé mós hanesan maun no mestre ida ne’ebé fó dalan ba ha’u atu tama iha mundu jurnalismu. Liuhusi nia orientasaun no ensinamentu, ha’u aprende barak no ikus mai bele sai jornalista. Ha’u sente agradese boot tebes ba Maun Otelio Ote, tanba nia ajuda no apoiu ne’ebé halo ha’u kontinua iha área ida-ne’e,” dehan nia.
Nia mós salienta katak Otelio Ote sempre hatudu atitude simples, maibé iha prinsípiu forte iha servisu, tanba ne’e nia konsidera verdade no interesse públiku hanesan prioridade iha jornalismu, no sempre motiva ema sira atu halo servisu ho loos no integridade.
Iha parte seluk, Sekretáriu ba Sekretariadu Estadu Komunikasaun Sosiál (SECOMS), Expedito Dias Ximenes, mos hato’o kondolénsia ba família no komunidade jornalístika no konsidera saudozu Otelio Ote hanesan simbolu ida bo’ot ba nasaun, liu-liu ba setór komunikasaun sosiál.
“Timor-Leste lakon jornalista seniór ida ne’ebé iha esperiénsia no dedikasaun aas. Nia kontribuisaun ba dezenvolvimentu media la bele haluha, no sei sai hanesan ezemplu importante ba jerasaun foun sira atu kontinua dezenvolve jornalismu ho profesionalismu,” dehan SEKOMS Expedito.
Tuir nia, governu liuhusi SECOMS sempre valoriza papél jornalista sira hanesan pilar importante ida iha demokrasia, no kontribuisaun husi ema sira hanesan Otelio Ote ajuda makaas iha prosesu konstrusaun nasaun.
Nia salienta taka, saudozu Otelio Ote husik hela eransa morál no profissionál ida ne’ebé bo’ot, liu-liu iha área formasaun no kapasidade jornalista sira no barak husi sira ne’ebé simu ona nia ensinamentu agora kontinua servisu iha media oioin iha rai-laran.
Governante ne’e dehan, maski nia la iha ona iha mundu ida-ne’e, maibé nia hanorin no valór sira sei kontinua moris iha servisu jornalístiku iha Timor-Leste no katak komunidade jornalístika espera katak espiritu no dedikasaun husi Otelio Ote sei sai inspirasaun ba gerasaun foun atu kontinua luta ba informasaun ne’ebé loos, livre no responsável.SEKOMS Expedito haktuir tan katak Timor-Leste la’ós de’it lakon jornalista ida, maibé mos lakon mentor no lider morál ida iha área komunikasaun sosiál no katak Otelio Ote sei lembra nafatin hanesan figura ne’ebé fó kontribuisaun bo’ot ba dezenvolvimentu jornalismu iha nasaun Timor-Leste.
