Ministériu Edukasaun (ME) distribui ona livru kurríkulu foun síklu III ba Eskola Ensinu Báziku (EBC) iha munisípiu neen (6).
Ministra ME, Dulce de Jesus Soares dehan, livru refere hodi implementa prosesu ensinu aprendizajen tenke la’o tuir kurríkulu ne’ebe iha ona.
“Ita distribui ona livru hamutuk unidade haatnolu-resin-lima (45) ba eskola ensinu báziku hamutuk hitunolu-resin-lima (75) iha munisípiu neen (6),” nia dehan.
Ministra salienta tan katak munisípiu 6 ne’e mak Aileu, Ainaro, Liquiçá, Ermera, Díli no Manatuto, depois sei ba fali eskola sira seluk tuir tarjetu ne’ebé defini tiha ona.
“Livru ida ne’e kompostu husi manual do profesór no manual do alunos husi materia sira hotu ne’ebé hanorin iha eskola,” Ministra ME Soares hatete.
Nia hatete, livru hirak ne’e produz iha sentru imprensaun ME nian iha Comoro ne’ebé apoiu husi Ajensia Koreia Koica.
“Livru hirak ne’e distribui liuhusi Gabinete Avaliasaun no Dezenvolvimentu Kuirikulár no Rekursu Pedagójiku (GADCRP) servisu hamutuk ho Diresaun Nasional Patrimóniu no Lojístika (DNPL) halo distribuisaun ba livru kurríkulu foun síklu 3 Ensinu Báziku tinan 2026,” dehan Nia.
Entretantu, Diretór Edukasaun Munisípiu Manatuto, Patricio Quintão dehan, livru ne’ebé sira simu iha unidade 12 kompostu husi materia Matemátika, Língua-Portugeza, Desportu, Fizika, no seluk tan.
“Livru hirak ne’e ami sei distribui fali ba eskola ensinu báziku hamutuk 12 hodi fasilita prosesu aprendizajen,” nia hatete.Nia hatete, livru hirak ne’e sei distribui tuir nesesidade eskola nian, bainhira la sufisiente, Servisu Edukasaun Munisípiu nian sei halo fali fali karta ba ministériu nune’e bele aumenta tan livru.
