Akademista iha Universidade Nacional Timor Lorosa’e (UNTL) husu Polísia Nasional Timor-Leste (PNTL) tenke buka tuir autór sira ne’ebé prodús osan falsu hodi submete ba prosesu.
Dekanu Faculdade de Ciências Sociais e Políticas (FCSP) iha UNTL Alarico da Costa Ximenes dehan, liga ba kazu osan falsu Estadu tenke hola responsabilidade, tanba povu mak sai vitima ba aktu ne’e.
“Polísia tenke buka tuir autór sira ne’ebé prodús osan falsu hodi submete ba prosesu,” nia salienta.
Nia dehan, nasaun ne’e ki’ik fasil atu jere no identifika ema iresponsabilidade sira ne’ebé mak halo osan falsu hodi sirkula iha merkadu.
“Ita bele dehan, katak osan falsu ne’e la’ós povu baibain mak halo, maibé ema sira ne’ebé mak iha koñesimentu kona-ba prodús osan, sira mak halo hodi bosok povu,” nia informa.
Nia hatete, bainhira hetan autór hirak ne’e tenke fó sai prosesu final ba públiku atu bele hatene nune’e labele fó oportunidade ba ema seluk hodi halo tan aktu hanesan.
“Se la fó sai rezulta hanesan ita proteje hela aktu prodús osan falsu nune’e mós ita fó oportunidade ba ema seluk atu halo tan,” Dekanu FCSPXimenes informa iha Kampus Caicoli, Díli.
Entretantu Diretór Diresaun Servisu Investigasaun Kriminal iha PNTL Superientendente Asistente Mouzinho Correia dehan, sira hetan ona keixa husi Banku Nasional Timor-Leste (BNCTL) no agora dadaun hahú buka tuir ona suspeitu sira.
“Prosesu la’o ona hodi identifika autór sira ne’ebé prodús osan falsu no dadaun ne’e ita-nia ema iha ona terenu hodi buka tuir,” nia salienta.
Nia dehan, elementu ne’ebé atu deteta osan falsu iha rua husi karau nia matan ida osan orijinal karau matan kabuar no falsu matan oin seluk fali, nune’e mós osan orijinal mahar falsu mihis.
“Ita sei esforsu hodi buka tuir autór hirak ne’e hodi submete ba prosesu ita sei la husik ema hirak ne’e livre,” nia informa.Nia hatete, kazu osan falsu ne’e bele konsidera mós hanesan krime organizadu, tanba ne’e polísia sei la tolera.
