Sekretáriu Estadu Asuntu Toponómia no Organizasaun Urbana (SEATOU) ba oin sei kontinua identifika komunidade sira ne’ebé okupa uma portugés iha kapital Díli.
Sekretáriu ba SEATOU Germano Santa Britnes Dias hateten, kapital Díli iha komunidade barak mak okupa uma portugés nian hanesan iha Motael besik Jardim 5 de Maio ne’e.
“Ita sei identifika uluk komunidade hirak ne’ebé okupa uma husi tempu portugés nune’e mós rai atu nune’e bele muda sira husi fatin refere,” nia hatete.
Nia hatutan, depois identifika sei kria dialogu ho komunidade okupante sira oinsá hodi rezolve.
“Durante ne’e ita tau hela atensaun ba komunidade sira ne’ebé okupa uma portugés nian,” nia salienta.
Nia dehan tan komunidade sira ne’ebé okupa uma portugés ne’e mós tama hotu iha tarjetu SEATOU nian.
Entretantu, Xefe Suku Motael Luis António Gusmão Viegas dehan, total Suku Motaiel ne’e iha komunidade aldeia rua hanesan, Halibur no Liru, mak okupa uma no rai husi tempu Portugés no Indonézia nian.
“Komunidade iha Aldeia rua ne’e hamutuk xefe família iha atus-tolu (300) mak okupa uma no rai hirak ne’e,” nia hatete.
Nia dehan, loos duni katak uma husi Portugés no Indonezia, konsidera katak sai ona nain ba estadu no bainhira estadu haruka sai tenke sai.
“Husi autoridade lokal ita fó ona informasaun ba komunidade sira no sira hein de’it bainhira mak governu atu mai,” nia informa.Nia hatete, importante liu mak kria diálogu no komunidade sira no kria kondisaun di’ak mak sira, tanba komunidade hirak ne’e iha ferik katuas, labarik no inan isin-rua sira.
