Autoridade Munisípiu Díli (AMD) sei prepara fatin espesífiku atu organiza vendedór ambulante sira ne’ebé durante ne’e faan sasan iha fatin públiku sira iha kapitál Díli no inisiativa ne’e atu organiza atividade negósiu informál sira ho di’ak, nune’e hadia ordenamentu sidade nian.
Prezidente Autoridade Munisípiu Díli (PAM-Dili), Francisco do Santos, hateten atualmente vendedór ambulante sira barak mak faan iha estrada, liuliu iha trotoar leten no fatin públiku, halo movimentu tráfiku nomós bele afeta utilizasaun fatin públiku husi komunidade.
“Ita iha ona planu atu organiza ita-nia vendedór sira-ne’e hodi bele faan sira-nia sasan iha fatin sira ne’ebé ita sei prepara. Tanba ita hatene katak durante ne’e vendedór sira faan de’it iha estrada sira, maske seguransa ba hasai tiha no foti sira-nia sasan, maibé sira kontinua faan nafatin.
Ita labele fó sala hela de’it ba sira, maibé ita mós buka meiu oinsá para atu organiza ho di’ak hodi faan sira-nia sasan,” nia dehan iha Cristo Rei, Díli.
Nia esplika katak medida ida-ne’e la’ós atu hasai vendedór ambulante sira husi sira-nia atividade negósiu, maibé atu organiza di’ak liutan hodi bele ajuda sira kontinua buka moris iha ambiente ne’ebé ordenadu.
“Ita prepara fatin sira-ne’e iha jardin sira, maibé ita tenke kontrola sira, atu nune’e buat hotu bele organizadu no tenke envolve parte hotu hanesan sira ne’ebe mak faan hahan karik, AIFAESA tenke ba halo kontrola hodi haree sira-nia fatin ne’e moos kalae, hahan sira-ne’e diak kala’e, buat sira-ne’e mak ita sei halo,” dehan Francisco.
Nia hatutan katak organizasaun ne’e importante tebes atu bele garante sidade Díli sai limpu, ordenadu no komfortável ba komunidade hotu. Liuhusi medida ida-ne’e, PAM-Dili mos hakarak kria ambiente negósiu ne’ebé di’ak ba vendedór ki’ik sira.
Nia mós husu ba vendedór sira atu kolabora ho autoridade sira no respeita regra no orientasaun ne’ebé sei estabelese ona.
Iha parte seluk, vendedór ambulante ida ne’ebé durante ne’e faan sasan iha área sidade Díli Albino do Santos hateten katak, sira prontu atu kolabora ho PAM-Dili no kumpri regra sira ne’ebé sei estabelese no espera katak planu ne’e bele implementa lalais atu nune’e sira bele kontinua hala’o sira-nia atividade ho kondisaun ne’ebé di’ak liu iha sidade Díli.
“Se iha fatin espesífiku ida ba ami faan, ami móos sente di’ak liu, tanba ami bele faan ho seguru no la tauk bainhira autoridade mai halo kontrolu,” dehan vendedór Santos.Nia dehan planu fatin espesífiku ida ba vendedór ambulante sira, sira hein katak atividade negósiu sira bele la’o ho di’ak liu no la muda-muda fatin bebeik.
