Autoridade Lokal Suku Luka, Postu-Administrativu Viqueque, Município Viqueque, sei preokupa, tanba komunidade hamutuk umakain sanulu resin haat (14), sira-nia uma no propriedade hetan estragus, tanba dezastre naturál, to’o agora seidauk hetan apoiu husi governu.
Xefe Suku Luka, Manuel Gomes, husu ba Autoridade Protesaun Sivíl (APC) kona-ba situasaun komunidade sira enfrenta, autoridade suku aprezenta ona dadus kona-ba estragu no ema sira ne’ebé afeta ba APC, maibé to’o agora seidauk iha ajuda ruma ba sira.
“Ita hotu haree populasaun Uma-Boot sai vítima ba inundasaun husi mota Welolo. Komunidade sira uma hetan estragu makaas, maibé sira seidauk hetan apoiu. Nune’e ha’u sujere ba parte APC tau-matan ba ita-nia komunidade uma-kain 14 ne’ebé seidauk hetan apoiu,” nia dehan, iha nia servisu fatin Suku Luka.
Xefe Suku Gomes esplika katak inundasaun ne’e halo komunidade barak hasoru difikuldade boot, liuliu sira ne’ebé uma estraga husi mota Welolo iha tinan kotuk 2024-2025 bainhira akontese udan boot.
“Komunidade umakain 14 ne’ebé hela iha área refere sira-nia uma rai henek taka totál, bainhira akontese udan boot, hodi halo mota Welolo sae no tama komunidade sira-ne’e nia uma, tanba ne’e to’o agora komunidade balun hela iha kondisaun difisil, tanba-sira nia uma la di’ak ona atu hela,” nia esplika.
Nia akresenta katak governu presiza tau atensaun ba komunidade sira ne’ebé afetadu tanba inundasaun, tanba sira presiza apoiu atu bele hadia fila fali sira-nia moris depois estragu ne’ebé akontese.
Iha parte seluk, komunidade afetadu iha Suku Luka, Antonio Amaral Pinto, dehan katak nia ho familia sira sente triste, tanba to’o agora seidauk hetan ajuda ruma husi governu.
“Ami-nia uma estraga, no to’o agora ami seidauk hetan ajuda ruma, ami hakarak governu bele loke-matan atu haree ba ami-nia problema, tanba komunidade sira presiza ajuda atu bele kontinua moris ho di’ak,” dehan Antonio.
Antonio esplika katak parte balun husi uma komunidade sira estraga, tanba inundasaun ne’e, no sira hasoru problema atu hela ho di’ak, tanba ne’e mak komunidade sira hein katak governu bele ajuda lalais atu bele hadia sira-nia kondisaun moris.
Relasiona ho preokupasaun ne’ebé hato’o husi autoridade lokal no komunidade afetadu sira, Prezidenti Autoridade Protesaun Sivíl (APC), Jesuino dos Reis Matos Carvalho, hateten katak instituisaun ne’e simu ona informasaun no relatóriu husi autoridade lokál kona-ba komunidade sira ne’ebé afeta ba dezastre naturál.
Jesuino dos Reis esplika katak APC kontinua halo prosesu avaliasaun ba estragu sira ne’ebé akontese atu determina tipu ajuda ne’ebé presiza fó ba komunidade vítima sira.
“Família uma-kain 14 ne’ebé mak afeta husi inundasaun sira-ne’e hetan mós apoiu emerjénsia no sei hetan materiál rekuperasaun. Prosesu orsamentu apoiu ba maun-de-obra ne’e mak demora, tanba ne’e mak prosesu kleur, maibé ba ita-nia materiál rekuperasun nian ita preparadu hela,” nia esplika.
Nia dehan katak governu liuhusi instituisaun kompetente sei buka dalan atu responde ba nesesidade komunidade sira ne’ebé afeta, liuliu sira ne’ebé hasoru estragu iha uma no infraestrutura seluk tanba inundasaun.“Autoridade Protesaun Sivíl simu ona dadus husi autoridade lokal sira no agora kontinua halo avaliasaun atu bele determina ajuda ne’ebé presiza. Governu sei buka dalan atu responde ba nesesidade komunidade sira ne’ebé afeta,” dehan Prezidete APC Reis.
