Faculdade de Ciências Sociais e Políticas (FCSP) Universidade Nacional Timor Lorosa’e (UNTL) tinan ida-ne’e menus dosente ba Língua-Portuguesa (LP), tanba dosente ne’ebé hanorin matéria ne’e hetan reforma ona.
Dosente matéria LP iha FCSP Profesora Flávia Maria Agusta Martis dehan, fakuldade iha departamentu ualu (8) ho dosente ba Língua-Portuguesa iha na’in tolu (3), maibé na’in rua reforma ona iha Dezembru, agora hela ida de’it.
“Ita-nia dosente hanorin Língua-Portuguesa na’in rua ne’ebé tama ona reforma, tanba sira laiha informasaun atu reativa fila fali sira-nia kontratu signifika sira tama ona ba reforma.
Husi profesór hirak ne’ebé reforma ne’e impaktu boot ba fakuldade, tanba iha departamentu ualu (8) dosente ida de’it mak hanorin ne’e labele,dadaun ne’e falta dosente Língua-Portuguesa nian,” Profesora Língua-Portuguesa Agusta hatete iha Kampus FCSP Kaikoli, Díli.
Nia hatete, dekanu fakuldade tenke hato’o ba estrutura UNTL nian hodi bele rezolve tanba tanba estudante sei lahetan materia ida ne’e.
“Ha’u mesak labele perkore hotu departamentu ualu (8) ne’e, tanba kada departamentu ida ha’u bele hetan turma rua ne’ebé boot, ida-ne’e impaktu ba ensinu aprendizajen liu-liu ba Língua-Portuguesa nain,” nia salienta.
Nia rekomenda ba estrutura UNTL tenke rekruta profesór ba LP atu kobre departamentu iha fakuldade.
Dekanu FCSP Alarico da Costa Ximenes dehan, departamentu rua mak dadaun ne’e hasoru problema falta profesór ne’e liga ho reforma ne’ebé foin lalais governu implementa, fakuldade ne’e iha profesór na’in-haat (4) mak reforma ona.
“Dadaun ne’e ita-nia Departamento de Comunicação Social no Ciência Política falta tebes professór hodi hanorin estudante sira,” nia dehan.
Nia hatete, profesór na’in-haat (4) ne’e kompostu husi Deparatamento de Comunicação Social nian iha prosessor na’in-rua ne’ebé hanorin materia LP no profesór ba matéria espesífiku ida husi Siénsia Polítika no ida husi Dezenvolvimentu Komunitária.
“Husi departamentu halo ona karta hodi husu ba universidade atu halo rekrutamentu profesór hodi rezolve falta profesór ne’e, maibé to’o ohin loron seidauk iha rezultadu, tanba osan laiha,” nia informa.Nia hatete, dadaun ne’e profesór ne’ebé hanorin iha FCSP hamutuk na’in-hitunulu 70 kompostu husi permanente no kontratadu.
