Ministériu Saúde (MS) husu ba komunidade atu nafatin mantein vijilánsia no kontinua ho medida preventivu sira hodi kombate moskitu Aedes aegypti ne’ebe hadaet virus dengue ba iha komunidade sira.
Vise-Ministru ba Fortalesimentu Instituisional Saúde (VMFIS) José dos Reis Magno husu komunidade atu hamoos bee dalan hodi bele kombate moras dengue, bee nalihun sira taka tiha, troka bee iha vazu sira no atu nune’e susuk labele tolun ba.
“Iha tempu udan hanesan ne’e, risku ba proliferasaun moskitu komesa barak liu tan, ida-ne’e mak prejuizu ba saúde públiku. Ami apela ba komunidade atu koopera, konsiénsia hodi hamoos uma hun sira, no partisipa ativamente iha atividade eliminasaun moskitu sira.
Ita-nia ambiente ne’e tenke kontrola no hamoos hela de’it, komunidade sira tenke haree bee iha tanki sira ne’e tenke hamoos bebeik no tau aimoruk ba para susuk mai tolun ba karik susuk tolun sira ne’e bele mate hotu,” dehan Vise-Ministru Magno, iha hotel Novo Turismo, Díli.
Nia hatutan, MS kontinua fahe informasaun ba komunidade sira iha fatin hotu-hotu, tanba ne’e senti meiu hirak ne’e, bele konbate moras dengue ne’e iha Timor-Leste.
“Ita-nia Governu liuhusi Ministériu Saúde kontinua halo sensiblizasaun ba komunidade sira, maibé komunidade sira mak tenke hatene oinsá atu prevene aan husi moras sira ne’e. Ita hanorin komunidade sira se sira mak la halo tuir entaun moras ne’e sei nafatin eziste iha ita-nia rain, maibé ha’u fiar katak liuhusi meiu sira-ne’e bele kombate moras ne’e iha ita-nia rain,” nia informa.
Nune’e mós Xefe Suku Comoro Eligio José Marçal hateten, problema moras dengue ne’e sei rezolve bainhira komunidade sira iha konsénsia rasik hodi halo tuir informasaun ne’ebé saúde fó sai.
“Komunidade sira-ne’e barak entaun foer ne’e naran soe de’it iha uma sorin sira-ne’e, bee foer iha husi haris fatin mos la subar, husik sulin arbiru de’it. Ida-ne’e mak problema ba ita, ita atu kombate moras sira-ne’e komunidade mak tenke iha konsensia, atu labele soe foer arbiru.
Ita haree governu komesa ona organiza hodi hadia estrada sira tama tuir bairu sira-ne’e, hadia ona bee dalan sira-ne’e, entaun fiar katak buat hotu sei lao ho diak” nia dehan.
Nia hatutan, komunidade sira iha Suku Comoro ne’e barak tebes no susar atu kontrola, tanba ne’e hanesan xefe suku husu ba komunidade sira atu iha konsiénsia soe foer iha lixu, ne’ebé durante ne’e governu prepara ona.”Ami susar loos atu halo kontrola ba komunidade sira-ne’e, maibé agora ita haree ona katak SEATOU komesa tama ona iha fatin hodi sobu uma sira no halo estrada luan tan, hadia bee dalan sira, ida-ne’e di’ak, sela’e bee iha haris fatin sai arbiru de’it, estrada sira-ne’e bee nalihun bainloron mós la maran, tanba bee dalan la iha,” nia esplika.
