Eskola Ensino Básico Filial (EBF) iha Suku Macalaco, Postu-Administrativo Quelicai, Município Baucau, presiza tan professór hamutuk na’in-lima (5), tanba sei menus profesór sira hodi hanorin matéria hotu ba estudante sira.
Koordenadór EBF Macalaco, Samuel Freitas hateten dadaun ne’e eskola iha de’it prefossór permanente na’in-hitu (7) inklui koordenadór eskola, maibé lato’o hodi hanorin Primeiru (1) anu to’o Nono (9) anu.
“Husi professór na’in-hitu ne’e nain ida (1) tama ona reforma obrigatoriu, tanba ne’e ami presiza tan professór nain lima (5) hodi bele hanorin materia CFN (Ciência Fisica Naturais), Matemática, Língua Inglesa, Desporto no CVT (Competência para Vida e para Trabalho), tanba agora dadaun professór la to’o atu hanorin materia hirak ne’e,” dehan Koordenador da Eskola Freitas.
Nia hatutan materia hirak refere professór voluntáriu na’in lima (5) mak oras ne’e dadaun hanorin hela, espera katak bele hetan professór na’in-5 iha tempu badak nia laran.
Enkuantu total estudante sira iha eskola refere hamutuk na’in 132.
Iha fatin seluk, Ministra ba Ministériu Edukasaun, Dulce de Jesus Soares hateten kolokasaun professór bolsa kandidatu bazeia ba kuadru pessoal.
“Kuadru pessoal mak sei deside katak, iha eskola ne’ebá ita presiza professór na’in hira, área saida no nivel de ensinu saida,” dehan Ministra Soares.
Nia informa professór sira bele rekomenda, maibé tenke tuir kuadru pesoal atu prova katak prezisa professór ka la’e.
“Ministériu edukasaun iha ona kuadru pesoal husi pre-eskolar, ensinu baziku to’o ensinu sekundáriu, sira husu ne’e direitu sira-nian, maibé ita tenke chek uluk katak atu responde professór ou presiza re-kolokasaun. Aleinde ne’e mós ita sei haree sira tama iha agrupamentu ida ne’ebé,” MinistraSoares dehan.
Ministra ba ME afirma, entre agrupamentu hirak ne’e karik iha professór ruma iha eskola referidu dalaruma nia karga orariu seidauk loos.”Karik iha agrupamentu sira-ne’e mak la iha, ita hakat ba agrupamentu seluk, se agrupamentu la iha nafatin ita hakat ba postu-administrativu no ba munisípiu, ida-ne’e mak sistema ne’ebé ita koko oinsá atu jere rekursu umanu iha edukasaun,” tenik nia.
