Aldeia tolu Matau, Bahabuga, no Uani Uma, iha Suco Vessoru, iha Munisípiu Viqueque, la asesu ba bee moos no ba ne’e difikulta komunidade nia atividade loron liuliu atu uza bee ba hemu, tein, haris no nesesidade seluk tan.
Komunidade husi Aldeia Matau, Manuel Fernandes dehan durante ne’e bee moos laiha, tanba ne’e atu asesu ba bee moos tenke la’o dook besik oras ida mak foin to’o bee matan.
“Ami iha ne’e susar ba bee moos, autoridade lokál sira mai dehan atu dada bee mai, sira dada tiha paralon, maibé to’o agora seidauk bele dada bee mai ami. Bee laiha difikulta atividade sira atu uza ba tein, fase ropa, haris ne’e,” dehan nia.
Nia mós preokupa katak la asesu bee moos difikulta labarik sira no dalaruma ba eskola uza bee ituan de’it entaun sira fase oin de’it bele ba ona eskola.
“Situasaun ne’e halo ami-nia oan sira la asesu be moos no ijiene antes ba eskola. Tanba ne’e ha’u husu ba autoridade sira liuliu ami-nia Xefe Suco atu haree hodi responde preokupasaun sira-ne’e,” nia salienta.
Entretantu, Xefe Suco Vessoru, Paulo Fernandes dehan iha nia suku iha aldeia hitu (7), no aldeia haat (4) mak asesu ona ba bee moos, no aldeia tolu (3) seluk mak la asesu ba bee moos tanba dook husi bee-matan.
“Foin tinan ne’e ita iha projetu PNDS [Programa Nasionál Dezenvolvimentu Suco] dada bee moos ba komunidade aldeia hotu iha Suco ne’e. Maibé iha problema tékniku, tanba ne’e iha aldeia haat mak seidauk asesu bee moos tanba sira iha leten liu,” dehan nia.
Nia akresenta iha programa PNDS atu dada bee ba komunidade iha aldeia hotu, maibé problema iha eletrisidade mak forsa lato’o hodi fo bee ba aldeia sira iha leten liu, no aldeia sira besik asesu ona ba bee moos.
“Nu’udar autoridade sei haree no koalia ho tékniku sira kona-ba problema bee moos iha suku laran liuliu ba aldeia tolu ne’ebé seidauk asesu ba bee moos,” salienta nia.
Prezidente Autoridade Munisípiu (PAM) Francisco de Gonzaga Soares dehan, sei kontatu ho autoridade Suco nian hodi haree mekanizmu oinsa bele rezolve bee moos ba komunidade.
“Ha’u seidauk rona informasaun husi Nai Liurai Suco Vessoru nian kona-ba problema bee moos nian, tanba ita implementa ona PNDS atu dada bee moos ba komunidade,” afima PAM Viqueque Soares. Enkuantu iha Suco Vessoru kompostu husi aldeia hitu mak Baha-o, Bahabuga, Balabasiba (Balabaciba), Culudere, Matau, Mauboro, Uani Uma. Totál uma kain hamutuk 505 no abitante hamutuk rihun rua atus tolu (2300) resin.
