Estrada ligasaun Suco Vessoru ba Postu-Administrativu Watolari, iha Munisípiu Viqueque dadaun ne’e ho kondisaun aat no difikulta komunidade asesu ba merkadu iha nivel postu no munisipiu hodi lori sira-nia produtu ba faan iha merkadu.
“Iha ita-nia Suco ne’e estrada mak sai problema boot liu hanesan estrada ba komunidade sira hodi movimenta ba mai. Iha suku laran mós susar loos hanesan estrada ba Liasidi no Nunumalau tempu udan liu ladiak. Kondisaun estrada fó impaktu ba agrikultór sira hodi lori sira-nia produtu ba merkadu,” dehan Xefe Suco Vessoru, Paulo Fernandes.
Nia haktuir, bainhira tama ba tempu udan kondisaun aat liu tan, tanba estrada kuak, rai-tahu de’it namadoras difikulta tebes komunidade sira-nia movimentu.
“Produtu ne’ebé ita iha maka fos-rai, hudi, nuu, aidila, modo no seluk tan, maibé ita iha tempu udan, ne’e susar loos, maske povu hakarak lori sira-nia produtu ba merkadu hodi buka moris hodi sustenta sira-nia família no selu ona sira ba eskola, maibé ida ne’e mak realidade iha área rurál,” dehan Xefe Suco.
Nia salienta tan katak, asaun ne’ebé autoridade Suco nian hato’o ona proposta ba Administradór Postu no Prezidente Autoridade Munisípiu Viqueque nian.
“Iha Postu Watulari ami iha suku hitu, tanba ne’e, preokupasaun hirak ne’e ami hato’o ona proposta. Ita espera sei hetan resposta atu ne’e ho estrada di’ak bele fasilita komunidade livre asesu ba merkadu no movimenta ba-mai,” nia hatutan.
Entretantu, Komunidade Madalena Fernandes informa kondisaun estrada aat difikulta sira atu lori produtu sira ba faan iha merkadu.
“Ita durante ne’e iha merkadu komunitária iha suku ne’e, maibé atu faan produtu sira ladun folin, ema hotu iha, tanba ne’e presiza lori ba merkadu postu-administrativu Watulari no Munisípiu. Maibé susar ba ami mak kondisaun estrada aat no lori protudu sira ba to’o merkadu produtu aat hotu ona,” dehan nia.
Nia dehan, husu ba na’i-ulun sira atu hadia netik estrada hodi fasilita komunidade agrikultór sira bele asesu ba merkadu ho di’ak nune’e hetan rendimentu di’ak hodi sustenta família no selu oan sira ba eskola.
Relasiona ho asuntu refere Prezidente Autoridade Munisípiu (PAM), Francisco de Gonzaga Soares hateten, estrada sira ne’ebé liga husi Suco Vessoru ba Postu-Administrativu Watulari no iha Watucarbau dadauk ne’e iha hela prosesu diskusaun tékniku.
“Ita iha dekretu Lei Numeru 84/2023 ne’e Prezidente Autoridade Munisípiu iha kompeténsia bele ezekuta programa ruma ne’ebé ho kuantidade orsamentu 500 mil mai kraik. Orsamentu ba estrada mais de $500,000 ne’e konsentra ba Ministério Obras Públicas ita hanesan autoridade PAM nian koordena no hato’o pedidu,” informa nia.
Nia dehan estrada sira ne’ebé aat ne’e tama ona iha diskusaun no sei realiza iha tempu badak.“Estrada sira aat ne’e iha hela prosesu diskusaun tékniku, hanesan estrada ne’ebé liga husi Iliomar Watucarbau, Watulari to’o Natarbora no husi Asalaitula to’o Ossu, inklui ne’e tama ona iha planu no mudansa ne’ebé ita iha,” dehan PAM Soares.
