Primeiru-Ministru (PM) Kay Rala Xanana Gusmão dehan, lian materna ne’ebé durante ne’e utiliza iha eskola sira hodi sai hanesan lian alternativu nune’e bele transmite siénsia ba estudante, ne’e nu’udar dalan ida atu estudante bele aprende lian ofisiál.
“Ita konsidera lian materna iha eskola hanesan matadalan ba estudante sira hodi aprende lian ofisiál la’ós impedimentu ba lian ofisiál,” nia dehan iha Parlamentu Nasionál, Díli.
PM Gusmão hatete, iha eskola liu-liu iha nível pré-eskolár presiza utiliza lian materna hanesan matadan ba estudante sira, tanba estudante pré-eskolár kada munisípiu hatene lian materna, lian ofisiál ladun komprende no atu halo esplikasaun ba lisaun presiza lian materna.
“Ema ne’ebé ko’alia de’it lian Tetun mós seidauk hatene lian Português oinsá ho labarik sira, tanba lian materna ne’e kontribui tebes ba estudante sira hodi koñese lian ofisiál,” Xefe Governu Xanana informa.
Nia dehan, lian materna ne’e atu fasilita estudante sira aprendizajen lee no hakerek lian ofisiál Português.
“Prosesu hotu presiza lian materna no labele sees husi lian materna, tanba hodi eleva koñesimentu sira ba lian ofisiál,” nia salienta.
Nia hatete, lian materna tau iha kurríkulu hodi hanorin estudante sira iha eskola.
Entretantu, Koordenadór Rede Edukasaun Timor-Leste for Coalition (TLCE) Jóse Monteiro dehan, lian materna ne’e laiha benefísiu atu haroin estudante sira iha tempu ida dadaun ne’e, labarik hotu iha telefone sira hatene lian ofisiál tetun.
Nia dehan, TLCE nafatin no nia pozisaun lakonkorda uza lian materna hodi hanorin estudante iha eskola.
“Ita lakonkorda, tanba ita iha lian ofisiál rua Tetun no Português hanorin lian rua ne’e,” nia informa.Nia hatete, hanorin utiliza lian Português estudante sira lakomprende utiliza lian Tetun hodi halo esplikasaun la’ós lian materna.
