Ministra ba Ministériu Edukasaun (ME) Dulce de Jesus Soares hatete, husi Orsamentu Jeral Estadu (OJE) tinan 2026 ministériu sei nafatin esforsu hodi realiza programa prioridade liuliu kontrusaun sala de aula hodi garante kualidade sistema edukasaun iha Timor-Leste.
“Konstrusaun sala de aula kontinua sai prioridade ba Ministériu Edukasaun liga ba planu orsamentu tinan 2026 nian,” nia hatete.
Nia hatete, iha tinan 2026 ME sei konstrui tan sala de aula hamutuk atus-lima (500) ba eskola sira ne’ebé iha teritóriu laran ne’ebe identifikadu ona no sei kontinua hasoru problema falta sala de aula.
“Konstrusaun sala de aula atus-lima 500 ne’e ita-nia planu razoavel liga ho problema sala de aula ne’e eskola sira hasoru. Ita presiza tau atensaun,” Ministra Soares informa.
Nia hatete, sala de aula 500 ne’e sei konstrui iha eskola hamutuk atus-ida-rua-nolu-resin-rua (122) ne’ebé identifikadu menus sala de aula durante ne’e labele jere estudante sira ho di’ak hodi partisipa prosesu aprendizajen.
“Orsamentu tinan 2025 nian ita konstrui ona sala de aula hamutuk rihun-ida-atus-lima-lima-nolu (1.550) kompleta ho fasilidade, ba eskola sira iha territóriu laran,” nia salienta.
Alende ne’e Ministra Soares mós prepara sistema teknolojia modernu hodi garante kualidade aprendizajen ne’ebé tuir kurríkulu.
Entretantu, Koordenadór Rede Edukasaun Timor-Leste Coalition for Education (TLCE) Jose Monteiro dehan, programa sala de aula ne’e kada tinan sempre akontese iha eskola sira, tanba estudante sira sempre aumenta.
“Dili laran ne’e kada tinan estudante sira sempre butuk malu iha aula laran, tanba falta sala de aula,” nia dehan.
Nia hatete, estudante iha Díli labele tur iha sala laran, liu padraun, no Ministériu Edukasaun tenke reforsa polítika ida katak husi munisípiu hotu iha nível sekundáriu labele mai eskola iha Díli, bainhira remata ona mak bele mai hodi kontinua universidade.
“Eskola sira iha munisípiu seluk ne’e falta sala de aula, tanba sira enfrenta duni problema ida ne’e,” nia informa.Alende ne’e nia dehan, Ministériu Edukasaun tenke fó prioridade mós ba konstrusaun ba moru eskolár nune’e bele proteje área eskola nian husi animal, no ema sira ne’ebé hakarak estraga fasilidade eskola nian.
