Komunidade Postu-Administrativu Soibada, Munisípiu Manatuto, durante ne’e faan de’it sira-nia produtu iha área uma nian, tanba laiha merkadu.
Admistradora Postu-Administrativu (APA) Soibada, Terezinha da Costa Moniz dehan, antes ne’e komunidade sira sempre lori sira-nia produtu ba iha merkadu, maibé hahú tinan 2019 to’o ohin loron laiha ona, tanba merkadu refere hetan estragus tanba rai halai.
“Hahú husi tinan 2019 ita-nia komunidade sira faan de’it produtu ne’ebé sira iha, iha área besik uma nian,” dehan.
Nia informa, daudaun ne’e liuhusi Programa Intergradu Munisipál nian hili prioridade husi Asembleia Postu Administrativo nian hodi deside ona no konstrusaun ba merkadu refere.
“Ita hein de’it ona ba iha prosesu konstrusaun ba merkadu ida ne’ebé dignu hodi fasilita ita-nia komunidade sira faan sira-nia produtu,” Admistradora Postu Soibada Moniz dehan via WhatsApp.
Nia hatete, dadaun ne’e komunidade sira sei kontinua faan iha uma hodi hein prosesu konstrusaun ba merkadu foun.
“Ita-nia komunidade iha postu ne’e maioria vida agrikultór, tanba ne’e presiza tebes merkadu atu sira bele faan produtu ne’ebé mak sira iha,” nia salienta.
Entretantu, Juliana da Costa, agrikultora, dehan, durante ne’e produtu barak mak sira kuda hanesan fehuk, ai-farina, talas, batar no modo sira, maibé sira lalori ba merkadu tanba merkadu laiha.
“Ami faan iha uma mós dalaruma ema lasosa, tanba ema hotu halo to’os, entaun lafolin ami han de’it,” nia dehan.
Nia hatete, uluk sira sei faan iha merkadu ne’e sasan sei folin, tanba ema seluk ba sosa, maibé dadaun ne’e lafolin.”Ami-nia esperansa atu bele iha lalais merkadu foun nune’e ami bele lori ami-nia produtu ba faan nune’e ami bele sustenta ekonomia família, tanba ne’e husu atu aselera lalais konstrusaun ba merkadu ” nia informa.
