Ministériu Solidariedade Sosiál no Inkluzaun (MSSI), liuhusi Institutu Nasional Seguransa Sosiál (INSS), iha ona aplikasaun online foun atu fasilita no reforsa sistema seguransa sosiál iha Timor-Leste.
Ministra ba MSSI, Verónica das Dores hateten, aplikasaun online foun ne’e sei kontribui direta ba transparénsia, efisiénsia no asesibilidade ba servisu seguransa sosiál, liuliu ba kontribuinte sira iha setór hotu.
“Aplikasaun módulu online ne’e ninia objetivu xave mak, atu hakbesik no hafasil setór públiku no privadu ho sistema kontribuisaun regulár traballadór sira-nian ho efetivu no lais, aplikasaun ida-ne’e mós sei kontribui ba redusaun tempu ba traballadór no empregadu sira, liuliu bainhira hala’o reajustamentu ba dadus traballadór sira nian,” dehan Ministra ba MSSI, iha salaun Oka, Hudi-laran, Díli
Nia hatutan, liuhusi aplikasaun ne’e bele fasilita empregadór no funsionáriu sira bele akompaña kontribuisaun ba seguransa sosiál durante serbisu.
“To’o aplikasaun ne’e lansa, loron-loron susar tebes atu ema hamriik iha liña no ema ida ka rua de’it maka halo serbisu, nune’e lori tempu naruk, tanba ne’e, iha mundu dijitál ohin loron, ami prefere kria sistema ida hodi ajuda empregadór sira bele akompaña sira-nia fundu sira,” Ministra informa.
Iha sorin seluk, Prezidente INSS, Arlindo Pinto, klarifika tan katak plataforma online foun ne’e permite kontribuinte sira bele halo rejistrasaun, konsulta kontribuisaun, no simu informasaun importante seluk liuhusi aparellu dijital sira, nune’e fó asesu fasil no ekonomika ba servisu INSS.
“Servisu ida-ne’e mak resposta ba dezafiu ne’ebé INSS hasoru iha tempu naroman, hodi fó garantia seguransa ba kontribuinte sira, inklui akontesimentu hanesan moris, moris-ki’ik no penssaun,” hateten Arlindo Pinto.
Nia dehan, Governu Timor-Leste kontinua investe iha teknolojia informasaun nune’e hodi hadia servisu públiku, promove inkluzaun dijital, no foti nivel protesaun sosiál ba rai-laran.
Prezidente Pinto esplika, aplikasaun ne’e dijitaliza prestasaun servisu ba públiku ho objetivu lima hanesan, fasilita submisaun informasaun diretamente husi empregadór sira bazeia ba rekursu umanu, fasilita empregadór nia emisaun ba sira-nia boletin pagamentu rasik, fasilita empregadór sira-nia submisaun ba dokumentu rasik, fasilita operasaun no fornesimentu informasaun ba entidade, fasilita rejistu funsionáriu husi entidade sira.
“Tanba ne’e, ohin ami kontinua lansa módulu kontribuisaun seguransa sosiál husi sistema online, ne’ebé ami oferese ba ami-nia empregadór sira, liuliu iha setór públiku no privadu, neʼebé kontribui ona ba regularizasaun funsionáriu sira-nian,” nia hateten.
Aleinde ne’e nia dehan, ekipa téknika sira daudaun ne’e dezenvolve ona sistema finanseiru internu ba seguransa sosiál no planu atu integra iha sistema free balance.
“Tanba ita-nia lei seguransa sosiál mós hateten katak ita iha setór finanseiru rasik no ita-nia sistema rasik mak atu regulariza ita-nia sistema finanseiru seguransa sosiál,” Prezidente INSS reforsa.
