Komandu Polísia Nasionál Timor-Leste (PNTL) orienta membru sira husi Unidade Patrollamentu Fronteira (UPF) atu labele abandona postu fronteira sira.
Komandante Jerál PNTL Komisáriu Henrique da Costa dehan, dadaun ne’e atividade ilegál komesa akontese fali iha fronteira terrestre entre Timor-Leste no Indonézia, no UPF tenke kontrolu iha postu durante 24 oras.
“Ita orienta ona membru Unidade Patrollamentu Fronteira (UPF) labele abandona postu foun sira iha fronteira tenke kuntinua halo vizilansia máximu no labele husik sidadaun sira ultrapasa fronteira husi dalan ilegál,” nia informa.
Nia dehan, tenke halo intervensaun seriu ba kualker atividade ilegál sira iha liña fronteira.
“Krime kontrabandu ne’ebé mak durante ne’e ita rejistu mak hanesan, tabaku ilegál, minarai, obralan, no movimentu ilegál,” Komisáriu Costa informa.
Nia salienta tan katak autór ba kazu hirak ne’e prosesu hotu ona ba Ministériu Públiku no sira mak sei kontinua prosesu ba tribunál. Kona-ba evidénsia, aprezenta hotu ba Ministériu Públiku.
Aleinde ne’e nia dehan, ba oin UPF sei hasa’e volume patrollamentu no sei la fo livre ba atividade kontrabandu iha fronteira.
Entretantu, Xefe Operasaun UPF Inspetór Xefe Feliz Tilman dehan, dadaun ne’e kada postu iha membru na’in 4 balun iha na’in 3 no na’in 2, tanba pesoál menus tebes.
“Maske ita menus pesoál, maibé ita la abandona postu ita garante seguransa 24 oras hodi kontrolu atividade ilegál,” nia informa.
Nia dehan, dadaun ne’e situasaun seguransa iha fronteira kontroladu iha 24 oras nia laran.
“Maské ita menus pesoál, maibé ita nafatin esforsu hodi fó seguransa ne’ebé di’ak ba ita-nia povu no nasaun,” nia salienta.Enkuantu total pesoál dadaun ne’e iha kuaze 371 no monta iha kuartél UPF no iha postu 87 husi Munisípiu Covalima, Bobonaro, no Oe-cusse.
