Ministériu Edukasaun (ME) sosializa kona-ba kria paz, ba eskola hirak ne’ebé identifikadu risku ba konflitu inklui eskola 10 de Dezembru, Finantil, Nobel da Paz, 4 de Setembro no seluk tan.
Sekretáriu ba Sekretariadu Estadu Ensinu Sekundáriu Jerál no Tékniku Vokasionál (ESG-ESTV) Domingos Lopes Lemos dehan, sosializasaun refere liga ho programa ida hanaran ‘Diálogu Eskolár’ hodi forma karakter estudante sira-nian, atu hadook an husi konflitu no kria paz iha eskola no sosiedade.
Nia hatete, ME halo ida-ne’e hodi halo prevensaun konflitu iha eskola sira ne’ebé envolve no kria problema inklui, sempre tuda malu iha estrada públiku bainhira sai eskola.
“Ita halo sosializasaun kona-ba oinsá atu kria paz iha eskola no sosiedade ba estudante no profesór sira iha eskola hirak ne’ebé identifikadu iha risku ba konflitu,” SE ESG-ESTV Lopes dehan.
Nia hatete, liuhusi sosializasaun refere bele konstrui paz ba estadu, nasaun ho konstrui karakter estudante sira-nian hodi prepara potensialidade estudante nian iha futuru.
“Estudante tenke estuda didi’ak, aprende ho didi’ak, utiliza imi-nia tempu hodi estuda ho di’ak, imi mak futuru nasaun nian,” nia salienta.
Alende ne’e nia informa, ME fó ona sirkulár ida ba eskola sira, atu labele implementa arte marsiais iha eskola liu-liu ba profesór sira atu labele aplika aktu sira-ne’e.
Entretantu, Diretór Eskola Sekundáriu Jerál 10 de Dezembru Martinho Crosino dehan, loos duni katak durante ne’e estuda husi sira-nia eskola, estudante sire sempre tuda malu, baku malu ho eskola seluk liu-liu Finantil bainhira sai eskola.
“Bainhira akontese tuda malu husi estudante hirak ne’e, husi parte eskola sempre bolu kedan estudante refere no inan-aman hodi eduka, maibé kontinua fila fali aktu ne’ebé iha,” nia informa.
Nia hatete, estudante sira ne’ebé baibain karik problema ne’e husi parte eskola no inan-aman entrega mós ba polísia hodi eduka, maibé sira haluhan lalais de’it lakleur kontinua fali.
“Ita espera katak ho sosializasaun husi parte Ministériu Edukasaun (ME) hamutuk ho polísia ne’e bele kontribui ba kria paz no dame entre estudante sira,” Diretór ESG 10 de Dezembro Comoro Crosino dehan.Enkuantu nia dehan, dadaun ne’e total estudante iha eskola refere hamutuk na’in 1234 mak hala’o estudu iha ne’eba. Diretór apela mós ba inan-aman sira atu eduka mós oan husi uma molok ba eskola.
