Membru Parlamentu Nasionál husu Governu tenke kria polítika hodi investe liuhusi tau orsamentu boot iha dezenvolvimentu ba setór agrikola tanba, setór ne’e sai dezafiu hodi kompete iha merkadu rejionál iha Asosiasaun Nasaun Sudeste Azíatiku (ASEAN).
“Governu tenke kria polítika liuhusi tau osan hodi halo dezenvolvimentu ba setór agrikola,” Deputada Maria Angelina Sarmento dehan.
Nia mós salienta katak setór ekonomia iha Timor-Leste menus liu, tanba ne’e governu tenke investe osan boot iha setór agrikola hodi hasa’e produsaun rai-laran.
Nia hatete, ezemplu de’it iha ro 26 ne’ebé importa sasan mai TL no fila tula de’it konteiner haat (4) ka lima (5) ne’e hatudu katak TL seidauk iha produtu ne’ebé kualidade no iha mós kuantidade bele esporta.
“Ita tama ba ASEAN ne’e katak tinan ida ita tenke kontribui $2 milliaun, no ita tenke hatene saida mak ita hetan, ka ita sei hetan $10 miliaun kada tinan ka oinsa. Ita husu governu tenke atensaun,” nia husu.
Nia informa, durante ne’e produtu ne’ebé esporta mak kafé, kami, maibé foos laiha, tanba konsumu iha rai-laran de’it mós lasufisiente.
“Tuir dados ita presiza foos tonelada rihun 131 ba konsumu iha rai-laran, maibé dadaun ne’e ita produz de’it rihun 60-70 ida-ne’e dezafiu tebes,” Deputada Sarmento salienta.
Nia dehan, situasaun hirak ne’e akontese, tanba governu la fó atensaun hodi investe iha setór agrikola no ortikultura.
Entretantu, Vise-Primeiru Ministru no Ministro Asuntu Ekonómiku Dezenvolvimentu Rural no Habitasaun Komunitária Mariano Asanami Sabino dehan, liga planu IX governu konstitusionál nia prioridade mak promove kapitál produtivu, kapitál sosial, hodi investe iha produsaun no setór ekonómiku liuhusi investimentu iha setór agrikola.”Ita kontinua tau prioridade iha setór agrikola. Primeiru ita presiza fó formasaun ba agrikultor sira, hadia irigasaun, no moderniza ekipamentu nune’e bele dezenvolve agrikultura ne’ebé modernu no kontribui ba hasa’e produsaun rai-laran nune’e mós bele importa ba merkadu internasionál liuhusi iha ASEAN,” nia informa.
