Komandu FALITIL-Forsa Defeza Timor-Leste (F-FDTL) realiza treinu kombinasaun arma hodi hadia kapasidade membru nian nune’e bele prepara ba operasaun sira.
“Treinu kombinasaun arma ne’e hodi prepara kapasidade membru sira-nian bainhira hasoru operasaun sira, nune’e mós hadi’a saúde mental no fizíka hodi bele halo servisu loron-loron,” Xefe Estadu Maiór Jenerál F-FDTL Tanente Jenerál Domingos Raúl “Falur Rate-Laek” salienta iha Komponente Navál.
Nia dehan, partisipa husi membru F-FDTL husi komponente tolu Komponente Terreste, Komponente Navál, no Komponente Aériu Lijeira.
Nia hatete, treinu refere utiliza arma ne’ebé mak durante ne’e sira hodi nune’e bele utiliza no sai profisionál ne’ebé di’ak halo misaun efikas no efisiente mudansa ba disiplinár iha vida militár nune’e mós famíliar.
“Formadór ba treinu ne’e husi ita-nia membru F-FDTL rasik ne’ebé antes ne’e tuir ona kursu iha Amérika,” nia informa.
Nia dehan, husu ba membru sira atu partisipa didi’ak iha treinu kombinasaun arma ne’e nune’e bele aplika iha servsiu loron-loron nain.
Entretantu, Komandante Komponente Navál Kapitaun Fragata Mar no Guerra Comodoro Higinho das Neves dehan, forsa F-FDTL ne’e ki’ik no presiza forsa iha ne’ebé maduru oinsá servsiu hamutuk liuhusi kria amizade.
“Ami komandu tolu (3) halo desizaun hodi realiza treinu kombinasaun arma ba ita-nia membru husi komponente tolu ne’e, hodi entende malu bainhira komandu operasaun sira,” nia informa.
Nia dehan, treinu ne’ebé sira halo inklui halo navegasaun, triu bala real, utiliza helicopter ba operasaun nune’e sira bele fahe esperiénsia ba malu hodi prepara ba futuru hodi orienta iha terenu.
“Komandante pelotanu fó orden ba membru sira oinsá sira bele ezekuta nomós apoiu malu iha servisu operasaun,” nia informa.Nia hatete, treinu ne’e importante tebes ho nia objetivu prinsipál sira no ezersisiu sei la para iha ne’e maibé sei la’o nafatin kada tinan.
