The United Nations Childern Fund (UNICEF), Vise Reprezentante iha Timor-Leste, Mr. Yew Hee Cheah hateten, UNICEF apoiu ona frasku vasina Tétanus nian hamutuk 11,600 ba Ministériu Saúde (MS).
“Vasina ne’e administra nu’udar pasu ida ba Timor-Leste ne’ebé saudavel liu, prósperu liu. UNICEF apoia Ministériu Saúde iha aprovizionamentu vasina hotu tuir programa imunizasaun rutina liuhosi Memorandu-Entendimentu (MOU) ne’ebé eziste,” dehan Reprezentante UNICEF Mr. Cheah Yew Hee, iha hotel Novo Turismo, Díli.
Nia dehan, previzaun anuál ba vasina sira ne’ebé lidera hosi MS determina doze sira hosi vasina ida-idak. UNICEF sosa no entrega doze vasina nian iha lote sira hodi asegura utilizasaun ótimu no desperdísiu vasina mínimu.
“Entrega vasina Tetanus ne’e prova komitmentu UNICEF atu hadia moris labarik sira no prevene moras ne’ebé bele prevene,” dehan Mr. Yew.
Iha fatin hanesan Vise-Ministru ba Operasionalizasaun Ospitál (VMOH) Flávio Brandão Mendes de Araújo hateten, ministériu agradese atu apoio tékniku no lojístiku husi UNICEF, tanba apoiu ne’e fó oportunidade atu aumenta kapasidade no distribui vasina ba ema hotu.
“Ohin tempu atu ita haree hodi halo di’ak liu, tanba ita ko’alia buat rua, imunizasaun no partisipasaun,” dehan VMOH.
VMOH hatutan, vasinasaun, imunizasaun ne’e responsabilidade morál ida-idak nian.
Iha fatin hanesan Reprezentante Organizasaun Mundiál Saúde (OMS/WHO) iha Timor-Leste Dr. Arvind Mathur hateten, Timor-Leste nia atinjimentu iha imunizasaun inklui livre husi polio, halakon sarampu, rubéola no tétanus maternu no neonatál, no ida ne’e tenke prezerva.
“WHO kontinue fó asisténsia teknika ba ekipa saúde iha terenu, atu hatene oinsá atu loke, fó no hela vaksina ho padraun internasionál,” hatete representante WHO Dr Mathur.Nia enkoraja hotu atu kontribui ho ativu atu nune’e Timor-Leste bele dezenvolve estratéjia ida ne’ebé bazeia ba evidénsia ho kustu no ne’ebé fó impaktu reál, ne’ebé bele sukat,” nia dehan.
