Sekretariadu Estadu Komunikasaun Sosial (SEKOMS) apoiu Ministériu Edukasaun (ME) lansa ona programa Literásia dijitál ba eskola iha Munisípiu hitu (7).
Sekretáriu ba SEKOMS Expedito Dias Ximenes informa, objetivu husi programa ne’e atu aumenta komprensaun estudante sira-nian, hodi bele uza teknolojia ba benefísiu edukativu, no prevene utilizasaun sala, tanba evolusaun teknolójiku ne’ebé la’o lalais liu.
“Programa literásia dijitál ne’e bele asesu liuhusi telemóvel, no fó oportunidade ba inan-aman atu bele akompaña no kontribui ba prosesu aprendizajen oan sira-nian iha eskola,” nia hatete.
SEKOMS Ximenes hatete, munisípiu hitu (7) mak implementa ona programa ne’e kompostu husi Díli, Aileu, Manatuto, Lautém, Liquiçá, Ermera no Manufahi, programa ne’e atu promove kapasidade estudante no manorin sira kona-ba utilizasaun teknolojia no responsabilidade ba plataforma dijitál.
Nia dehan, eskola hitu husi munisípiu hitu ne’ebé mensiona ne’e sai hanesan programa pilotu depois ekipa sei halo monitorizasaun bazeia ba rezultadu ne’e mak sei kontinua implementa tan ba eskola sira iha territóriu laran.
“Programa ne’e mós fó oportunidade atu iha jornál parede dijitál, ida ne’e plataforma importante ba estudante sira, hodi publika obra kreativu, informasaun relevante no narasaun estudante sira-nia lian rasik,” SEKOMS Dias informa.
Nia informa, governu sei kontinua fó suporta, inklui formasaun ba profesór no estudante sira kona-ba oinsá hakerek, edita no públika konteúdu sira iha plataforma dijitál refere. Inisiativa ne’e bele estimula kreatividade, komunikasaun efetivu no aprendizajen dijitál ne’ebé importante ba jerasaun foun iha Timor-Leste.
Entertantu Reprezentante Eskola Bázika Filiál Bedoco Profesora Olandina Natalia Ximenes hatete, espera katak programa hirak ne’ebé governu implementa bele kontribui ba dezenvolvimentu edukasaun iha TL.
“Husi parte eskola ami kontente, tanba bele hili ona sai programa pilotu hodi implementa programa literásia dijitál ne’e hodi bele dezenvolve koñesimentu estudante no manorin sira nian ba utiliza teknolojia,” nia informa.
Nia hetete espera katak programa ne’e bele kontribui ba dezenvolvimentu abilidade estudante nian liu-liu kona-ba utilizasaun iha parte pozitivu sira.Aleinde ne’e husu atu kria netik kode ruma hodi kontrolu utiliza ba estudante sira nune’e bele prevene sira utiliza ba parte negativu.
