Governu China liuhusi Embaixada China iha Timor-Leste apoiu ekipamentu eletróniku ba eskola hamutuk 37 hodi fasilita estudante sira partisipa iha prosesu aprendizajen no profesór sira prepara metodolojia eskolár.
Ministra ba Ministériu Edukasaun Dulce de Jesus Soares dehan, eskola 37 ne’ebé sai benefisiária ba apoiu ne’e liuhusi lista afetadu ba dezastre naturais iha tinan 2021 ne’e.
“Ita mós sei oferese kedas formasaun kona-ba utiliza ekipamentu eletróniku hirak ne’e ba profesór sira husi eskola hirak ne’ebé sai ona benefisiáriaba apoiu ne’e,” ME Soares informa.
Nia hatete, eskola 37 ne’e kompostu husi Munisípiu Ermera, Ainaro, Aileu, Liquiçá, Dili no Bobonaro no eskola hira ne’e hetan ona apoiu kartera eskolár, no ekipamentu didatiku sira enkuantu ekipamentu eletróniku mak seidauk.
Nia dehan, ekipamentu eletróniku ne’e apoiu husi governu China hamutuk laptop 34, projetor 34, USB 34, kada eskola sei hetan ekipamentu ho tipu oin tolu ne’e ida-ida.
Entretantu Embaixadora China iha Timor-Leste, Wang Wenli dehan, edukasaun reprezenta esperansa nasaun ida nian, tan ne’e halo dijitálizasaun ba setór edukasaun hodi aselera plataforma iha ensinu sai nu’udar ferramenta importante hodi hadia asesibilidade no kualidade edukasaun nian.
“Ekipamentu hirak ne’e objetivu atu hasa’e profesór sira-nia komprensaun domíniu utilizasaun inovativu ba ekipamentu TIC no ferramentu hanorin online, la’ós de’it motivasaun abilidade téknika sira, maibé inisiativa importante ida atu hakbiit estudante iha eskola sira,” nia informa.
Nia hatete, Governu China nafatin prontu hodi apoiu moderniza dezenvolvimentu edukasaun iha Timor-Leste bainhira presiza.
Iha fatin hanesan Reprezentante Profesora husi Eskola Ensinu Báziku Filial (EBF) Bedoco Olinda Natalia Ximenes dehan, ho ekipamentu ne’ebé oferese husi Governu China ajuda tebes ba prosesu aprendizajen.
“Ekipamentu hirak ne’e ajuda tebes ami-nia prosesu aprendizajen la’o nafatin bainhira akontese dezastre ruma ami bele utiliza ba prosesu aprendizajen iha plataforma online ba estudante sira,” nia hatete.Nia hatete, liuhusi ekipamentu ne’e husi parte eskola promete sei utiliza de’it ba prosesu aprendizajen iha eskola nune’e mós halo preparasaun ba matéria eskola nian no sei la utiliza ba privadu.
