Organizasaun Working Women Center Timor-Leste (WWCTL) fó formasaun ba partisipante feto rural na’in 324 hodi kapasita sira atu prontu bainhira hakarak asesu servisu ba doméstika tantu iha kapitál Díli no munisipíu seluk.
“Formasaun ne’e oinsá bele prepara sira bainhira sira mai Díli atu asesu ba servisu formal sira, maibé lakonsege sira bele asesu ona ba servisu doméstika,tanba iha ona koñesimentu,” Diretora WWCTL Ricar Pascoela Soares dehan.
Nia haktuir katak maiória feto servisu doméstika sira balun remata iha ensinu báziku no balun iha sekundáriu no balun la eskola, sira la-iha koñesimentu kona-ba servisu doméstika nune’e mós kona-ba oinsá halo negosiasaun ba saláriu no oinsa rezolve problema bainhira enfreta problema iha servisu fatin.
“Ita fasilita formasaun no ita mós bele buka servisu fó ba sira no ita nafatin hamriik iha sira-nia kotuk bainhira sira hasoru problema,” nia informa.
Alende ne’e nia dehan, dadaun ne’e seidauk iha lei espesífiku hodi proteje servisu na’in doméstika sira.
Entretantu, partisipante Asencia Nicol Gonia agradese tebes ba inisiativa husi WWCTL nian nune’e bele fó oportunidade ba sira bele asesu ba kampu traballo maské ba servisu doméstika.
“Liuhusi formasaun ne’e hanesan dalan ida mai ami ne’ebé laiha edukasaun no labele asesu servisu iha kantor, maibé bele fasilita ami iha servisu doméstika,” nia dehan.
Nia dehan, formasaun ida-ne’e bele kontinua hodi fó oportunidade ba maluk feto sira seluk ne’ebé mak dadaun buka hela servisu bele asesu ba servisu.
Sekretária ba Sekretariadu Estadu Igualdade (SEI), Elvina Sousa Carvalho hatete, SEI iha ona programa hodi servisu hamutuk ho organizasaun feto sira nune’e bele fó kapasitasaun ba grupu feto sira inkliu feto traballadór doméstika sira.
“Servisu doméstika sira-ne’e profisaun ida, tanba ita buka oinsá atu bele hasa’e liután sira-nia kapasidade hodi bele hala’o sira nia knaar ho profesionalismu,” nia hatete.Alende ne’e nia dehan, SEI halo ona sosializasaun no formasaun ba feto rural sira, maibé jerál la’ós espesífiku ba iha servisu doméstika nian, maibé ba oin tenke realiza formasaun profisionál ba sira.
