Autoridade Protesaun Sivíl (APC) halo ona apoiu rekoperasaun hodi konstrui fali hela fatin ba vitíma uma-kain hamutuk atus-ida-sanolu-resin-ida (111) ne’ebé afetadu ba dezastre naturais iha tinan 2023.
Xefe Relasaun Externa Autoridade Protesaun Sivíl (APS) Nelson Nunes de Orleans dehan, uma 171 hetan dezastre naturais tipu inundasaun, ahi-han uma, ai-hanehan, anin sobu no rai halai hodi estraga komunidade hirak ne’e nia uma.
Nia hatete, antes ne’e governu liuhusi APC halo ona apoiu, no apoiu rekoperasaun halo ikus tanba sei halo fila fali verifikasaun ba uma hirak ne’e hodi haree kategoria ka la’e hodi hetan apoiu rekoperasaun.
“Ita identifika uma-kain hamutuk 171 husi munisípiu Aileu iha uma 17, Díli 7, Liquiça 76, Ainaru 16, Lautem 25 Manufahi 30 mak kategoria no ita halo ona apoiu rekuperasaun hodi konstrui fali sira nia hela fatin,” nia informa.
Nia dehan, APC apoiu material kontrusaun sira hanesan, kalen, sementi, besi, pregu, no ekipamentu kontrusaun seluk tan nune’e mós osan mão de obra tuir medida uma nian, balun $3,000 balun iha $4,000.
“Osan ne’ebé ita fó utiliza hodi selu badaen no kompleta ekipamentu balun karik ne’ebé governu apoiu la sufsiente,” Xefe Relasaun Externa APC Nunes dehan.
Nia dehan, ekipamentu hirak ne’e atu utiliza hodi konstrui uma la’os ba faan fali.Tanba ne’e husu ba komunidade sira tenke utiliza sasan hirak ne’e tuir nesesidade.
Iha parte seluk, vítima Graciana Fernandes dehan, orgullu tebes tanba sira bele hetan ona apoiu husi governu hodi bele hari uma atu bele hela.
Nia hatete, nia uma ahi han ona iha tinan 2023, maibé agradese tanba, governu nafatin buka tuir povu hodi fó apoiu.
“Kontente tebes, maske ami nia uma ahi han ona iha tinan rua ba kotuk (2023), maibé governu sei buka tuir nafatin hodi responde ba terus no susar ne’ebé durante ne’e ami hasoru,” nia saliente.
Nia husu governu nafatin buka tuir maluk balun ne’ebé mak antes ne’ebé afetadu ba dezastre naturais to’o agora seidauk hetan tulun nune’e bele fo mós apoiu ba sira.Enkuantu, total vítima iha territoriu laran tomak ne’ebé APC apoia ona rekoperasaun hamutuk uma-kain 497. Husi dadus ne’e katgoriza ba uma ne’ebé aat total iha 104, aat natoon iha 69 no aat kmaan 311, ho orsamentu hamutuk $354.950.
