Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária (VPM-MKAS-MDRAK) Mariano Assanami Sabino, konsidera parteira sira-nia papel no funsaun nu’udar sagradu no sira mak eroi ne’ebé bele salva inan no bebé.
“Parteira mak bele salva futuru nasaun nian, tanba parteira sempre halo knaar ho domin, fó partus ba inan sira, salva inan ho bebé nia vida ne’ebé sai hanesan futuru Timor nian,” dehan VPM-MKAS-MDRAK Assanami iha selebrasaun Loron Munidial Parteira nian, iha City-8 Manleuana, Díli.
Nia hatutan, liuhusi koordenasaun servisu ho Ministériu Saúde hahú kria kondisaun liuhusi apoiu Ajensia Internasional Japaun JICA nian, prosesa dadaun ona konstrusaun uma andar haat (4) ba inan ho bebé iha HNGV no governu mós halo kooperasaun ho ajensia internasional sira konsegue konstrui ona sala maternidade hamutuk sia-nolu-resin iha teritoriu laran tomak.
VPM Assanami agradese ba família parteira sira-nian, liu-liu oan no laen sira, tanba bele disponibiliza tempu ba parteira sira hala’o nia funsaun iha kualker tempu hodi halo atendimentu ba inan no bebé sira.
Iha fatin hanesan, Vise-Ministru ba Operasionalizasaun Ospitál, Dr Flávio Brandão hatete, governu rekoñese parteira sira-nia kompromisu hodi dudu progresu nasionál iha saúde inan no bebé foin moris iha momentu partus.
“Parteira sira la’ós de’it ajuda hamenus mortalidade inan nian, maibé importante tebes atu alkansa ita-nia meta saúde nasionál ne’ebé boot liu, tanba ne’e governu nafatin iha kompromisu atu investe iha formasaun parteira nian, dezenvolvimentu profisionál, no hadi’a kondisaun servisu hodi garante katak inan no kosok-oan hotu-hotu hetan kuidadu ho di’ak,” dehan Vise-Ministru Brandão.
Nia hatutan, parteira sira maka edukadora, defensora, no líder ne’ebé komunidade sira fiar ho investimentu sira ne’ebé loos, sira bele fornese to’o 90% hosi servisu esensiál ba saúde seksuál, reprodutiva, maternu no neonatál, no prevene besik dois-tersus hosi mate inan no bebé foin moris nian.
Iha parte seluk, Prezidente Asosiasaun Parteira Timor-Leste (APTL) Dra. Lídia Gomes hatete, fó ónra ba parteira sira iha Timor-Leste no iha mundu tomak, tanba parteira sira la’ós de’it kuidadora, maibé parteira maka liña salvasaun nian, la’ós de’it prezente iha partu, maibé parteira sira prezente iha momentu krize hotu, ida-ne’e prova beibeik katak parteira sira esensiál iha krize hotu-hotu.
“Ita-nia nasaun hasoru krize boot liu sira hosi inundasaun boot iha 2021 to’o dezafiu pandemia COVID-19, parteira sira hamriik metin, ho kompaixaun, no reziliénsia. Ami la hein, ami atua, ami atravesa mota sira, sa’e foho sira no brani atu proteje inan sira ho sira-nia bebé foin moris bainhira sistema kuidadu saúde nia liu ona nia limite,” nia dehan.
