Organizasaun Cruz Vermelha Internasional Timor-Leste (CVTL) halao atividade doasaun raan, hodi ajuda pasiente sira iha Hospital Nasional Guido Valadares (HNGV), iha kapital Díli, ne’ebé mak presiza raan, tanba durante ne’e pasiente balun susar tebes atu hetan raan.
Sekretáriu Jeral CVTL, Luis Pedro Pinto dehan, relasiona ho atividade ne’e CVTL hamutuk ho Banco de Sangue konvida estudante sira husi Universidade da Paz (UNPAZ), nomós estudante iha eskola Ingles SOLS halo doasaun raan.
“Atividade ida-ne’e faz parte komemorasaun loron Mundial Cruz Vermelha Internasional ne’ebé maka monu iha loron 8 fulan ida-ne’e [Juñu]. Atividade ne’ebé ami halo ne’e ami servisu hamutuk ho Banco de Sangue, depois ami hanesan parseiru hamutuk ho hala’o atividade doasaun raan,” hatete Sekretariu Jeral CVTL Luis, iha Bairro Formosa, Díli.
Nia esplika, CVTL hala’o doasaun raan hanesan parte importante husi kampaña solidariedade no ajuda umanitaria, espesialmente ba ema ne’ebé presiza urjente raan, hanesan ema moras, inan isin-rua nolabarik sira, tanba doasaun ida bele salva vida.
Nia tenik, CVTL mós halo parseiru di’ak ho instituisaun husi privadu, universidade nomós embaixada no sira seluk ne’ebé maka durante ne’e fornese sira-nian raan.
Iha fatin hanesan, Arcenio Afonso husi Banco de Sangue, HNGV nian esplika, sira parseiru di’ak ho CVTL hodi organiza atividade doasaun raan, hodi konvida estudante husi UNPZ, UNTL, nomós estudante husi AHHA Education / SOLS ne’ebé hakarak no voluntariamente atu fó sira-nia raan ba pasiente sira ne’ebé baixa iha HNGV.
“Atu selebrasaun loron Mundial Cruz Vermelha, ita selebra ho atividade doasaun raan, tanba atividade ida-ne’e atu hasai raan husi voluntáriu sira, tanba raan hanesan prezente ne’ebé moris, tanba raan makbele salva ema,” nia informa.Nia deklara, funsaun husi Banco de Sange mak apoiu téknika hodi hasai raan, no raan sira-ne’e rekolla hodi analiza teste, depois raan ne’ebé la afetadu ba moras mak bele fó ba pasiente sirasira.
