Eskola Ensinu Báziku Filial (EBF) Nazaré Laua husu Ministériu Edukasaun (ME) atu distribui livru ba estudante sira hodi fasilita sira lee iha uma.
Koordenadór EBF Nazaré Lauala, Sr. Amandio da Fátima Martins, dehan estudante sira iha vonte atu lee livru, maibe ba ida ne’e akontese presija tebes estudante sira iha asesu ba livru ho konteúdu oin-oin hodi fahe ba estudante sira atu lori ba uma para hatoman an liu tan hodi lee.
Nia dehan, bainhira lee sai ona kustume ba sira mak, estudante sira sei aprende liután nune’e prepra futuru ne’ebé naroman hodi dezenvolve Timor-Leste.
“Ita presiza tebes livru atu rai iha eskola nune’e mós fahe ba estudante sira hodi fasilita sira lee iha uma,” Koordenadór EBF 195 Nazaré Lauala, Sr. Martins dehan.
Nia husu, ba ministériu atu kontinua prodúz livru halo barak nune’e bele fahe ba kada eskola ba estudante hotu-hotu hodi hetan.
“Livru ne’ebé mak ME distribui ona mai ami-nia eskola ne’e limitadu tebes, ami preokupa tebes ba livru,” nia informa.
Alende ne’e nia salienta, livru ne’ebé iha eskola sira fó ba estudante sira lori ba uma hodi aprende liután.
“Nune’e mós ita husu ba inan-aman sira tenke kontrola ona sira iha uma no hatoman sira lee,” nia saliente.
Entretantu Sekretáriu ba Sekretáriu Estadu Ensinu Sekundáriu Jerál no Tékniku Vokasionál (SJ-ESTV) Domingos Lopes Lemos dehan, lee atu hatoman-an oan sira lee, inan-aman mós tenke kaer livru la’ós loron kalan ho telefone de’it.
Nia dehan, responsabilidade inan-aman nian mak akompaña oan sira husi idade ki’ik, hodi nune’e boot mai ne’e hatoman-an ona sai matenek no lee barak.
“Kona-ba livru ne’ebé limitadu iha eskola sira, governu esforsu nafatin hodi prodúz livru sira ho konteúdu oin-oin hodi bele fahe ba estudante sira,” nia informa.
Nia dehan, iha tinan kotuk (2024) ne’e ministériu fahe ona livru hamutuk 4 mil ho konteúdu oi-oin ba eskola sira iha territóriu laran, maibé sei menus nafatin.
“Dadaun ne’e ita-nia livru iha armajen kuaze 3 mil, maibé sei prodúz tan hodi kompleta livru ba iha eskola sira,” nia hatete.Nia informa, ministériu mós sei haruka tan ekipa ba halo identifikasaun ba eskola sira hodi hatene eskola hira mak sei menus livru nune’e bele prodúz, tanba bazeia ba orsamentu.
