Governu liuhusi Ministériu Saúde (MS) hamutuk ho Organizasaun Mundial Saúde (OMS) iha Timor-Leste halo lansamentu ba kampaña semana nasionál nutrisaun kona-ba preparasaun ijiene ai-han ne’ebé di’ak ba inan isin-rua no oan sira iha Timor-Leste (TL).
“Timor-Leste ho esperansa no komprimisiu boot, ita ofisialmente lansa Kampaña Semana Nasional Nutrisaun nian, apelu nasionál ida ba asaun saúde no moris di’ak ita-nia povu.
Kampaña ida-ne’e fó hanoin mai ita katak nutrisaun maka sai nu’udar sentru ba dezenvolvimentu nasionál no potensiál umanu,” hatete Vise-Primeiru-Ministru no Ministru Koordenadór ba Asuntu Sosiál, Mariano Assanami Sabino iha Salaun CNE, Díli.
Nia dehan, nutrisaun mak fundasaun ne’ebé di’ak ba komunidade sei sai forte no sidadaun ne’ebé produtivu, kresimentu ekonómiku ne’ebé sustentavel, bainhira labarik sira hetan nutrisaun, sira sai forte no aprende di’ak liután no bainhira inan sira hetan nutrisaun, família sira buras no bainhira komunidade sira hetan nutrisaun, nasaun sei sai prósperu.
Iha fatin hanesan, Ministra ba Ministériu Saúde (MS) Elia dos Reis Amaral informa, kampaña semana nasionál nutrisaun ne’e hanesan esforsu nasionál ba promove saúde, nutrisaun, no ai-han seguru ba kada sidadaun.
“Nutrisaun sai hanesan parte importante ida iha dezenvolvimentu ema nian, hahú kedas ho períodu konsesaun, durante grávida, bebé sira, labarik, adolesente, adultu to’o idozu mak sai tarjetu ba intervensaun nutrisaun di’ak ba siklu moris tomak.
Ministra MS bolu ba asaun sira hanesan han ai-han ne’ebé nutritivu, variedade no seguru, kuidadu ba inan isin-rua no labarik ki’ik, promove fó susubeen inan no prátika fó han ne’ebé di’ak, evita bebidas no ai-han sira ne’ebé ho masin barak no bokur la saudavel sira.
Reprezentante OMS iha Timor-Leste, Arvind Mathur, esplika TL nia inisiativa ida-ne’e atu hamriik nu’udar xamada ba asaun no reflesaun ida ba kompromisu nasionál atu harii nasaun saudavel liu, forte liu, no rezidente liu.
“Ha’u agradese ba Ministériu Saúde, tanba vizaun ne’ebé makaas no haree ba oin iha Planu Estratéjiku Nasional Saúde no Nutrisaun 2022–2026, hodi deside semana ida kada fulan hanesan semana nutrisaun nian, governu haruka mensajen ida ne’ebé klaru no maka’as nutrisaun la’ós eventu ida ne’ebé akontese dala ida de’it ka polítika ida iha surat-tahan ida-ne’e liuliu prioridade nasionál ida ne’ebé presiza atensaun sustentavel, asaun trans-setorial, no envolvimentu iha nivel baze,” katak nia.Nia afirma, tuir komprensaun, nutrisaun la’ós de’it kona-ba hahán iha bikan. Ida ne’e kona-ba labarik ida nia abilidade atu aprende. Inan ida nia abilidade atu partu ho seguru. Iha Timor-Leste, iha ne’ebé labarik na’in ida hosi na’in rua tinan lima mai karik hetan nafatin kresimentu ne’ebé ladún di’ak no iha ne’ebé mall nutrisaun kontinua sai barreira ba dezenvolvimentu umanu.
