Koordenadór Programa Asisténsia Moras Mentál iha Organizasaun Psychosocial Recovery and Development in East Timor (PRADET), Nicolau Vicente Ximenes hateten, konten kreatór sira labele uza fali ema defisiénsia inklui mental hodi sai objetu ba sira-nia atividade.
“PRADET nia haree meiu ida-ne’e sala, tanba ita-nia maluk sira ne’ebé sofre moras mental konserteza saida mak nia halo, koalia no asaun sira, iha komunidade balun simu no balun lae entaun hamosu tan persepsaun positivu no negativu ba iha maluk sira ne’ebé sofre moras mental,” nia ko’alia iha nia servisu fatin iha Manleuana, Díli.
Nia hatutan, ema sira ne’ebé mak mentalidade di’ak ne’e buka dalan hodi fó asistensia ba sira, la’ós uza fali ema defisiénsia mental sira hodi trata fali ema seluk.
“Ita haree iha video balun maluk sira-ne’e mós hetan agresaun fisiku husi komunidade sira, ne’e tanba sira mos hetan ameasa husi ema sira ne’ebé haruka sira. Dalabarak ita mak iha kotuk hodi ataka ema seluk, tanba ema seluk bele komprende no balun mós la komprende bele foti ba asaun seriu fo fali agresaun fisiku ba maluk sira ne’ebé sofre moras mental. Loloos ita haree ona katak ita kria ona risku ba ita-nia maluk sira-ne’e,” nia esplika.
Nia salienta, maluk defisiénsia mental sira hela fatin la permanente, entaun susar ba atu halo asisténsia ba sira-nia saúde.
“Ami seidauk iha informasaun, maibé ami rona kuaze sira-nia movimentu la permanente dalaruma lao ba mai de’it karik iha familia ruma kolabora depois ami bele halo intervensaun hodi lori sira ba iha sentru saúde sira hodi minimiza sira-nia situasaun iha públiku.
Kuandu iha familia sira ne’ebé mak halo deskrimina liuliu kesi sira kuandu ami hetan informasaun, ami sempre kolabora ho lideransa sira iha munisipiu atu halo intevensaun, tanba ami konsidera hanesan tratamentu ida ne’ebé deshumanu,” nia akresenta.
Iha fatin ketak, Konten Kreatór Mariana Paya dos Santos hateten, hakarak sai konten kreatór tenke kreativu.
“Ita hanesan konten kreatór ne’e tenke kreativu, hodi halo video rasik, atu nune’e publiku labele kestiona. Se ita la kreativu naran halo video de’it entaun ikus públiku kestiona, tanba ema la gosta ita-nia konten,” nia dehan.Nia hatutan, konte kreatór la kreativu, sira hakarak buka followers barak, maibé sira la hatene atu kria konten rasik, sira haree deit buat ruma mosu iha sira-nia oin sira halo video tuir loos ida-ne’e labele akontese.
