Ministériu Solidariedade Sosial no Inkluzaun (MSSI) apoiu orsamentu ho montante $2 milhões ba Institutu Solidariedade Sosial (ISS) hamutuk 38 iha territóriu laran tomak hodi ajuda ema sira ne’ebé moris ho defisiénsia.
“Proposta ne’ebé ami simu husi ISS sira-ne’e hamutuk 39, maibé institutu ida maka ekipa juri no observadór kansela, tanba nia konteúdu proposta ne’e hanesan kompeténsia ne’ebé ministériu haktuir ba, entaun ami sei hein hela instituisaun hodi hato’o nia argumentu, nune’e ISS hamutuk 38 de’it mak pasa”, hateten Diretór Jeral MSSI Florencio Pina Dias, iha Salaun MSSI Kaikoli, Díli.
Nia hatutan, instituisaun sira ne’ebé MSSI aloka orsamentu ba kompostu husi uma-mahon, orfonatu no sentru komunitáriu.
“Uma mahon hamutuk sia (9) ho sira-nia osamentu $509.967,65. Ba orfonatu hamutuk 6 ho sira-nia totál orsamentu $282.147,86, sentru komunitária hamutuk 11 ho nia osan iha $660.233,68 no ba área defisiénsia iha 12 ho totál oramentu $547.650,82,” nia esplika.
Nia dehan, sentru komunitária 11 ne’e, husi sentru 9 maka hetan tulun husi kooperasaun Ministériu Traballu Seguransa Sosiál Portugal ne’ebé lao ona dezde tinan lima ba kotuk.
“Nune’e deside ita apoia 70% no Portugál 30% maibé depois Ministra ba Ministériu Traballu Seguransa Sosiál Portugál mai hateten Timor-Leste 50% no sira 50% no kada osan ne’ebé governu rua apoiu maka hamutuk $477.838,95,” nia dehan.
Nia dahan, avaliasaun proposta sira-ne’e husi MSSI sempre halo diskusaun ho partisipa direta hosi ISS hotu ne’ebé submete sira-nia proposta.
Entretantu Vise-Primeiru-Ministru no Ministru Ministériu Koordenadór Asuntu Sosial, Ministru Desenvolvementu Rural Habitasaun Komunitária Mariano ‘Assanami’ Sabino, dehan, ema mak poténsia ba dezenvolvimentu nasionál, tanba ne’e tenke investe osan iha ISS atu tulun ema vulneravel sira.
“Ema mak ita-nia riku soin, ita-nia potensia hodi lori estadu ba oin. Maibé iha ema ne’ebé ho kondisaun diferensa tanba ita lakohi ema ida iha kotuk, ita hakarak dezenvolve igual iha sosiedade timorense. Ita iha rikusoin mina-rai, maibé ita-nia rikusoin ne’ebé lori nasaun ba oin mak ema,” Nia informa.
Vise-PM Assanami dehan, apresia ba madre, padre, individu ne’ebé fó nia tempu hodi atende ba orfonatu sira no ba servisu sosiál sira.
“IX Governu nafatin iha komitmentu hodi apoiu MSSI, maibé nia rekoñese tinan ne’e orsamentu redús, maibé nafatin esforsu hodi bele apoiu labarik ki’ik sira no orfonatu sira. Tanba ne’e ohin ha’u hase madre, padre no komunidade ne’ebé tau matan ne’e katak imi mak as’wain no parte importante ida, ne’ebé Governu sempre konta ho imi ba konstrusaun estadu,” Nia esplika.
Enkuantu Diretora Asosiasaun Esperansa, Madalena da Costa, hateten, tinan ne’e asosiasaun ida-ne’e hetan rihun $20 .
“Ha’u sente kontente no onradu bo’ot mai ha’u, tanba liuhosi prosesa lubuk ida mak ohin loron ami-nia asosiasaun ne’e bele hetan apoia hosi Governu liuhosi MSSI. Tanba foin dahuluk hetan apoia hosi MSSI”, Madalena hateten.
Nia dehan, husi orsamentu ne’e foku liuba programa feto ho labarik feto defisiénsia hasoru diskriminasaun hosi família, komunidade ne’ebé laiha dalan atu hato’o keixa.
“Ami prontu servisu ho governu. Nune’e sei halo sensibilizasaun ba komunidade liuliu ba feto, labarik feto ho kondisaun defisiénsia iha munisípiu Bobonaro, Oecusse, no Covalima,” dehan nia.
