Fardamentu ba membru FALINTIL-Forsa Defesa Timor-Leste (F-FDTL) nia Komponente Forsa Navál hamutuk na’in 400 ne’ebé mak hetan estragus husi inundasaun iha fulan Janeiru tinan 2025 ne’e rezolvidu ona.
Komandante Komponente Naval, Comodoro Higinho das Neves dehan, durante inundasaun ne’ebé akontese iha dia 7 fulan Janeiru tinan 2025 membru barak mak halo servisu ho ropa sivil, tanba farda ne’ebé sira utiliza at hotu.
“Kona-ba fardamentu ba membru na’in 400 ne’e rezolve ona, tanba stock iha Metinaro ona, nune’e mós botas rezolve ona liuhusi apoiu ne’ebé hetan husi Governu Austrália,” Komandante Neves dehan iha Fatuhada, Díli.
Nia haktuir ekipamentu militár ne’ebé mak hetan estragus ne’e kompostu husi farda no botas membru sira-nian nune’e mós fadilidade dormitóriu nian no ekipamentu servisu balun hanesan komputadór sira.
“Fasilidade dormitóriu mak ohin governu foin distribui mai Komponente Navál no membru sira bele utiliza,” nia dehan.
Nia informa, ekipamentu hirak ne’ebé governu entrega ona ne’e sufisiente ba membru sira.
Alende ne’e nia dehan, dadaun ne’e mós Komandu F-FDTL sosa tan farda ba militár iha Indonézia hodi bele distribui ba membru sira.
Entretantu, Ministru ba Ministériu Defeza Kontra Almirante Donaciano Costa Gomes “Pedro Klamar Fuik” dehan, ekipamentu militár ne’ebé mak governu entrega ba Komponente Navál hodi kompleta fali sira ne’ebé mak hetan estragus husi inundasaun.
“Ita rezolve primeiru mak komputadór no fardamentu tanba ita-nia stok armajen Menitaro iha hela. Tanba ne’e ita foti no distribui de’it, no botas apoiu husi ita-nia parseiru governu Austrália, hamutuk 1000,” nia informa.
Nia dehan, fasilidade ne’ebé mak governu sosa mak fasilidade dormitóriu nian inklui kama, kulsaun, sumasu no manta tanba sira-nian hetan estragus tanba inundasaun.
“Fasilidade dormitóriu ne’e ita sosa ho orsamentu montante hamutuk $6,000,” Ministru Kontra Almirante “Pedro Klamar Fuik” informa.Nia dehan, husu ba membru sira atu utiliza didi’ak ekipamentu hirak ne’ebé governu distribui nune’e bele utiliza iha tempu naruk, nune’e governu bele rezolve fali problema seluk.
